പത്തനാപുരം: പനിബാധിതരുടെ എണ്ണം ദിനംപ്രതി വര്ദ്ധിക്കുമ്പോള് വിപണിയില് താരമാവുകയാണ് മാതള നാരങ്ങ. പനിബാധിതരില് ഭൂരിഭാഗം പേര്ക്കും രക്തത്തിലെ പ്ലേറ്റ്ലെറ്റ് കുറഞ്ഞുവരുന്നതാണ് മാതളനാരങ്ങയ്ക്ക് ഡിമാന്റ് കൂടാന് കാരണം. രക്തത്തിലെ പ്ലേറ്റ്ലെറ്റുകളുടെ എണ്ണം വര്ദ്ധിക്കാന് മാതളം കഴിക്കുന്നതിലൂടെ ഒരു പരിധിവരെ സാധിക്കും. അതിനാല് പഴവര്ഗങ്ങളുടെ കൂട്ടത്തില് മാതളം കഴിക്കാന് ഡോക്ടര്മാരും നിര്ദേശിക്കുന്നു. ഒരുമാസം മുന്പ് മാതളം കിലോക്ക് 60 രൂപയ്ക്ക് ലഭിക്കുമായിരുന്നെങ്കില് ഇന്ന് 120 രൂപയ്ക്ക് മുകളിലാണ് വില. മഞ്ഞ നിറത്തോടും, കടുംചുവപ്പ് നിറത്തോടും കൂടിയ മാതള നാരങ്ങകളാണ് വിപണികളില് ഉള്ളത്. ഇതില് ചുമന്ന നിറത്തോടു കൂടിയതിനാണ് ആവശ്യക്കാര് ഏറെ. രക്തത്തിലെ പ്ലേറ്റ്ലെറ്റുകള് കൂടുന്നതിനും രക്തക്കുറവ് പരിഹരിക്കുന്നതിനും മാതളനാരങ്ങ ജ്യൂസ് അത്യുത്തമമാണെന്ന് പറയുമ്പോഴും പ്രമേഹരോഗികള് ഇത് കഴിക്കുന്നത് ഒരുപരിധി വരെ ഒഴിവാക്കണമെന്നും വിദഗ്ധര് നിര്ദ്ദേശിക്കുന്നുണ്ട്.
‘ജൗിശരമ ഴൃമിമൗോ’ എന്നാണ് ഇതിന്റെ ശാസ്ത്രീയനാമം. മഹാരാഷ്ട്രയിലും ഗുജറാത്തിലും ഉത്തര്പ്രദേശിലും ഇത് വാണിജ്യവിളയായി കൃഷി ചെയ്തുവരുന്നു. കേരളത്തില് മാതളം വര്ഷം മുഴുവനും പൂക്കാറുണ്ടെങ്കിലും സാധാരണ വര്ഷകാലത്താണ് കൂടുതല് പൂക്കുന്നത്. മറ്റു പഴങ്ങളെ അപേക്ഷിച്ച് വളരെക്കാലം കേടുകൂടാതിരിക്കുന്ന ഒന്നാണ് മാതളം. സംസ്കൃതത്തില് ‘ഡാഡിമം’എന്നും ഹിന്ദിയില് അനാര് എന്നും അറിയപ്പെടുന്നു.
അഫ്ഗാനിസ്ഥാന്, പാകിസ്താന്, ഇറാന് എന്നീ രാജ്യങ്ങള് ഉള്പ്പെടുന്ന മേഖലയാണ് മാതളത്തിന്റെ ജന്മസ്ഥലം. ആരോഗ്യകരമായ ഒരു ജീവിതം നയിക്കാന് ഇഷ്ടപ്പെടുന്ന ഏവര്ക്കും ഗുണകരമായ ഒരു ഫലമാണ് മാതളനാരങ്ങ. വിറ്റാമിന് എ, സി, ഇ, ബി5, ബി3, ഇരുമ്പ്, ഫോളിക്കാസിഡ്, പൊട്ടാസ്യം എന്നിങ്ങനെ നിരവധി പോഷകങ്ങളും അടങ്ങിയട്ടുണ്ട്. പോഷകഗുണത്തില് മാത്രമല്ല നിരവധി ആരോഗ്യ പ്രശ്നങ്ങള് പരിഹരിക്കുന്നതിനും മാതളനാരങ്ങാ ഫലപ്രദമാണ്. ക്യാന്സര് ചികിത്സയ്ക്കായി കീമോതെറാപ്പിക്കു വിധേയരാകുന്നവര് പതിവായി മാതളനാരങ്ങാ കഴിക്കുന്നതും ഗുണകരമാണെന്ന് ഡോക്ടര്മാര് പറയുന്നു.
