ഒറ്റപ്പാലം: കണ്ണിയം പുറം പ്രജിന് വധകേസില് പോലീസ് അറസ്റ്റു ചെയ്ത അഞ്ചു പ്രതികളില് മൂന്നു പേരെ ഒറ്റപ്പാലം കോടതി റിമാന്റു ചെയ്തു.
ഇന്നലെ പോലീസിനുമുന്നില് കീഴടങ്ങിയ രണ്ടു പേരെ കോടതിയില് ഹാജരാക്കിയ ശേഷം കൂടുതല് ചോദ്യം ചെയ്യുവാനും തെളിവെടുപ്പിനുമായി പോലീസ് കസ്റ്റഡിയില് വാങ്ങി.
ഇന്നലെ പോലീസിനു കീഴടങ്ങിയ കണ്ണിയംപുറം താഴത്തേതില് വിനോദ് (27) മനക്കപറമ്പില് വിമല് (22) എന്നിവരാണു ഇപ്പോള് പോലീസ് കസ്റ്റഡിയിലുള്ളത്.
ആദ്യം അറസ്റ്റിലായ മനക്കപറമ്പില് രതീഷ് (35) കണ്ടനശ്ശേരി ശരത്ത് (23)തെക്കും പുറത്തുപറമ്പില് രമേശ് (28) എന്നിവരാണു റിമാന്റിലായത്. ഇവരുമായി അന്വേഷണ സംഘം കഴിഞ്ഞ ദിവസം സംഭവസ്ഥലത്തു നടത്തിയ തെളിവെടുപ്പില് ആയുധങ്ങള്കണ്ടെടുത്തിരുന്നു.
പ്രജിന്വധവുമായി ബന്ധപ്പെട്ട് ഇനിയും ഒരാള് കൂടി അറസ്റ്റിലാകാനുണ്ട്.
പ്രധാന പ്രതികളില് ഒരാളാണിത്. ഇയാള് കുത്തേറ്റ് ആശുപത്രിയില് ചികിത്സയിലാണ്. കഴിഞ്ഞ ഒന്പതിനു രാത്രിയാണ് കണ്ണിയം പുറം ജെകെ നഗര് ചപ്പിലതൊടിയില് പ്രജിന്(27) സംഘര്ഷത്തിനിടെ മര്ദ്ദനമേറ്റ് കൊല്ലപ്പെട്ടത്.
ഇയാള് ഇരട്ടകൊലപാതക കേസിലെ പ്രതിയായിരുന്നു.
