വാഷിങ്ടണ്: നൂറ്റിനാലു ഉപഗ്രഹങ്ങള് ബഹിരാകാശത്തേക്ക്, അതും ഒറ്റ റോക്കറ്റില്, ഇന്ത്യയുടെ ഈ നേട്ടത്തില് ഞെട്ടിപ്പോയെന്ന് അമേരിക്കയുടെ ഇന്റലിജന്സ് മേധാവി. സെനറ്റര് കൂടിയായ ഡാന് കോസ്റ്റ്സാണ് ഈ വാര്ത്ത അറിഞ്ഞപ്പോഴുള്ള തന്റെ പ്രതികരണം എന്തായിരുന്നു എന്ന് അറിയിച്ചത്.
കഴിഞ്ഞ മാസം പതിനഞ്ചിനാണ് ഇന്ത്യയുടെ ബഹിരാകാശ ഏജന്സി ഐഎസ്ആര്ഒ ഒറ്റ റോക്കറ്റില് 104 ഉപഗ്രഹങ്ങള് ഭ്രമണപഥത്തില് എത്തിച്ചത്. ഇതില് ഏറെയും അമേരിക്കയില് നിന്നുള്ള ഉപഗ്രഹങ്ങളായിരുന്നു. നാസയില് നിന്ന് വിരമിച്ച ശേഷം സ്വകാര്യ സ്പേസ് ഏജന്സി ആരംഭിച്ച വ്യക്തിപോലും ഉപഗ്രഹ വിക്ഷേപണത്തിനായി ഐഎസ്ആര്ഒയെ തെരഞ്ഞെടുത്തത് അമേരിക്കയില് ചര്ച്ചയായിരുന്നു.
ഡാന് കോസ്റ്റ്സിനെ കഴിഞ്ഞ ദിവസമാണ് അമേരിക്കയുടെ നാഷണല് ഇന്റലിജന്സ് ഡയറക്റ്ററായി പ്രസിഡന്റ് ഡൊണാള്ഡ് ട്രംപ് നിയമിച്ചത്. ഉപഗ്രഹ വിക്ഷേപണത്തിന്റെ പിറ്റേന്ന് ആ വാര്ത്ത വായിച്ച് ഞെട്ടിപ്പോയി. ഒറ്റ ഉപഗ്രഹത്തില് 104 ഉപഗ്രഹങ്ങള് ഇന്ത്യ വിക്ഷേപിച്ചു എന്ന വാര്ത്ത ഞെട്ടിച്ചു. ചെറിയ ഉപഗ്രഹങ്ങളായിരിക്കാം, ഓരോന്നിനും വ്യത്യസ്ത ദൗത്യങ്ങളായിരിക്കാം.
എന്നാല് ബഹിരാകാശത്ത് 104 പ്ലാറ്റ്ഫോമുകള് എന്ന സാധ്യതയെക്കുറിച്ചാണ് ഞാന് ആലോചിച്ചത്. ഒറ്റ ഉപഗ്രഹ വിക്ഷേപണത്തിലൂടെ അത് സാധിക്കാം എന്ന് ഇന്ത്യ തെളിയിച്ചിരിക്കുന്നു, ഡാന് പറഞ്ഞു.
