ടെഹ്റാന്: ഇറാന്റെ പാര്ലമെന്റിലും ആത്മീയ നേതാവ് അയത്തൊള്ള ഖൊമേനിയടെ ശവകുടീരത്തിലും ഇസ്ലാമിക് സ്റ്റേറ്റ് ഭീകരര് നടത്തിയ ആക്രമണത്തില് പന്ത്രണ്ടു പേര് കൊല്ലപ്പെട്ടു. നിരവധി പേര്ക്ക് പരിക്കേറ്റു.
ഇറാന്റെ ചരിത്രത്തില് അടുത്തിടെയൊന്നും കേട്ടിട്ടില്ലാത്ത തരത്തിലാണ് ഭീകരര് പാര്ലമെന്റ് ആക്രമിച്ചത്. ഇറാന്റെ ആത്മീയ നേതാവ് അയത്തൊള്ള ഖൊമേനിയുടെ ശവകുടീരം ഭീകരര് ബോംബു വെച്ചു തകര്ത്തു. ആക്രമണം നടത്തിയ നാലു ഭീകരരെ ഇറാന്റെ സുരക്ഷാ സേന വധിച്ചു. ഇറാനില് ഇസ്ലാമിക് സ്റ്റേറ്റ് ആസൂത്രണം ചെയ്യുന്ന ആദ്യ ഭീകരാക്രമണമാണിത്.
പാര്ലമെന്റ് വളപ്പില് കടന്ന ഭീകരര് നാലാമത്തെ നില വരെയെത്തിയാണ് ആക്രമണം നടത്തിയത്. ഒരു ഭീകരന് ഇവിടെ സ്വയം പൊട്ടിത്തെറിച്ചു. കൊല്ലപ്പെട്ടവരില് രണ്ട് സൈനികരും ഉള്പ്പെടുന്നു. അഞ്ചു മണിക്കൂര് നേരത്തെ പോരാട്ടത്തിനൊടുവിലാണ് ഭീകരരെ വധിച്ചത്. 12 മരണം എന്നത് ഇറാന്റെ ഔദ്യോഗിക വാര്ത്താ ഏജന്സിയായ ഐആര്ബിഐ പുറത്തുവിട്ട വിവരമാണ്, മരണസംഖ്യ ഇനിയും കൂടിയേക്കാമെന്നാണ് അനൗദ്യോഗിക റിപ്പോര്ട്ടുകള്. 42 പേര്ക്ക് പരിക്കേറ്റു എന്നാണ് ഐആര്ബിഐ പറയുന്നത്. ആക്രമണത്തെ വിവിധ ലോകനേതാക്കള് അപലപിച്ചു.
മജ്ലിസ് എന്ന വിളിക്കുന്ന ഇറാന്റെ പാര്ലമെന്റ് ചേര്ന്നു കൊണ്ടിരിക്കുമ്പോള്ത്തന്നെയായിരുന്നു ചാവേര് ആക്രമണം. സിറിയയിലും ഇറാഖിലും ഇസ്ലാമിക് സ്റ്റേറ്റിനെതിരായ സൈനിക നീക്കത്തിലെ പ്രധാന പങ്കാളിയായിരുന്നു ഇറാന്. ഭീകരരും സുരക്ഷാ സേനയും ഏറ്റുമുട്ടുമ്പോഴും പാര്ലമെന്റിലെ നടപടികള് തുടര്ന്നു. ഇസ്ലാമിക് സ്റ്റേറ്റിന്റെ വാര്ത്താ ഏജന്സിയായ അമാഖ് ആക്രമണത്തിന്റെ വീഡിയോ ദൃശ്യങ്ങള് പുറത്തുവിട്ടു. ഒരു ഭീകരന് വെടിയുതിര്ത്തു കൊണ്ട് പാര്ലമെന്റിന്റെ ഇടനാഴിയിലൂടെ ഓടുന്ന ദൃശ്യമാണിത്.
സ്ത്രീകളുടെ വേഷത്തിലാണ് ഭീകരര് പാര്ലമെന്റിനുള്ളില് കടന്നത്. സന്ദര്ശകര്ക്കുള്ള മുറിയിലൂടെ കടന്ന് തുടര്ച്ചയായി നിറയൊഴിച്ച് ഇടനാഴിയിലൂടെ പാര്ലമെന്റ് ഹാളിനുള്ളില് കടക്കാനായിരുന്നു ശ്രമം. എന്നാല് സുരക്ഷാ സേന ആ നീക്കം പരാജയപ്പെടുത്തി.
പാര്ലമെന്റില് ഏറ്റുമുട്ടല് തുടരുന്നതിനിടെയാണ് കുറച്ച് അകലെയുള്ള അയത്തൊള്ള ഖുമേനിയുടെ ശവകുടീരത്തിലേക്ക് നാലു ഭീകരരുടെ മറ്റൊരു സംഘം ഇരച്ചു കയറിയത്. ഖുമേനിക്ക് ആദരാഞ്ജലി അര്പ്പിക്കാന് നിരവധി പേര് എത്തിയിരുന്ന സമയമായിരുന്നു ഇത്. ഒരു വനിതാ ചാവേര് സ്വയം പൊട്ടിത്തെറിച്ചാണ് ശവകുടീരം തകര്ത്തത്.
