ചാവക്കാട്: പൊതുജനങ്ങള് ധാരാളമെത്തുന്ന മിനി സിവില് സ്റ്റേഷന് പരിസരത്ത് നഗരസഭ മാലിന്യം തള്ളിയതിനെതിരെ പരാതി. ധാരാളം വീടുകളുള്ള പ്രദേശമാണിത്. നഗരസഭയുടെ മിനി സ്റ്റേഡിയത്തിലേക്കുള്ള റോഡിനു സമീപമാണ് നഗരസഭയുടെ വണ്ടിയില് കൊണ്ടുവന്ന മാലിന്യങ്ങള് തള്ളിയത്.
കേവലം നൂറു മീറ്റര് അകലെ ധാരാളം കുടുംബങ്ങള് തിങ്ങി പാര്ക്കുന്നുണ്ട്. തൊട്ടടുത്തു തന്നെയായി സ്ഥിതി ചെയ്യുന്ന കനോലി കനാലിലേക്ക് മഴ കനക്കുന്നതോടെ ഈ മാലിന്യങ്ങള് ഒഴുകിയിറങ്ങും കെട്ടിക്കിടക്കുന്ന മാലിന്യങ്ങള് കൊതുകു വര്ദ്ധനവിനും സാംക്രമിക രോഗങ്ങള്ക്കും കാരണമാകുമെന്നതിനാല് എത്രയും വേഗം ഈ മാലിന്യങ്ങള് നീക്കം ചെയ്യണമെന്നാണ് പരിസര വാസികളുടെ ആവശ്യം.
നൂറു മീറ്റര് അകലെ നഗര മധ്യത്തില് ഇടതു അനുകൂല ട്രേഡ് യൂണിയന്റെ നേതൃത്വത്തില് വൃത്തിയാക്കുന്ന ഉപയോഗശൂന്യമായ കുളത്തിലെ മാലിന്യമാണ് ഇതെന്നും, നഗരത്തിലെ കച്ചവടക്കാരെ സംരക്ഷിക്കാനും, പൊതുജനത്തെ ദ്രോഹിക്കാനുമാണ് നഗരസഭ ശ്രമിക്കുന്നതെന്നും പരിസരവാസികള് പറഞ്ഞു.
താലൂക്ക് ആസ്ഥാനമെന്ന നിലയില് മിനി സിവില് സ്റ്റേഷനിലേയ്ക്ക് ദിവസേന ആയിരത്തോളം ആളുകള് വിവിധ ആവശ്യങ്ങള്ക്കായി എത്തുന്ന ഈ സ്ഥലത്ത് മാലിന്യങ്ങള് തള്ളുന്നതിനെതിരെ പൊതുജനം രംഗത്ത് വരണമെന്നും പരിസരവാസികള് ആവശ്യപ്പെട്ടു.
