പൂക്കോട്ടുംപാടം: ശ്രീവില്ല്വത്ത് ശിവക്ഷേത്രത്തിന് നേരെ സാമൂഹ്യവിരുദ്ധരുടെ ആക്രമണം. ശിവലിംഗവും മഹാവിഷ്ണു വിഗ്രഹവും അടിച്ചുതകര്‍ത്തു. കഴിഞ്ഞ ദിവസം രാത്രിയാണ് സംഭവം. ചുറ്റമ്പലത്തിന്റെ ഓടിളക്കിയാണ് അക്രമികള്‍ അകത്തുകടന്നത്. പ്രധാന പ്രതിഷ്ഠയായ ശിവന്റെ ശ്രീകോവിലിന്റെ പൂട്ടുപൊളിച്ച് ശിവലിംഗം അടിച്ചുതകര്‍ത്തു. ചന്ദ്രക്കലയും പ്രഭാമണ്ഡലവും അടങ്ങിയ അലങ്കാരങ്ങളൊന്നും നശിപ്പിക്കാതെ ശിവലിംഗം മാത്രമാണ് തകര്‍ത്തത്. തൊട്ടടുത്തുള്ള മഹാവിഷ്ണുവിന്റെ ശ്രീകോവിലും സമാനമായി തകര്‍ത്ത് വിഗ്രഹം മറിച്ചിട്ടിട്ടുണ്ട്. മോഷണമൊന്നും നടന്നിട്ടില്ല. ക്ഷേത്രത്തില്‍ സെക്യൂരിറ്റി ഉണ്ടെങ്കിലും രാത്രിയില്‍ നല്ല മഴയായതുകൊണ്ട് ഇയാള്‍ അറിഞ്ഞില്ല.
പുലര്‍ച്ചെ അഞ്ചുമണിക്ക് ക്ഷേത്രത്തിലെത്തിയ കഴകക്കാരന്‍ ഗോവിന്ദന്‍കുട്ടി വാര്യരാണ് ആദ്യം സംഭവം അറിഞ്ഞത്. തുടര്‍ന്ന് മേല്‍ശാന്തിയായ പ്രസാദിനെ വിളിച്ചുവരുത്തുകയായിരുന്നു. വില്ല്വത്ത് ക്ഷേത്രത്തില്‍ നടന്നുവന്നിരുന്ന ഭാഗവത സപ്താഹയജ്ഞം ഇന്നലെ അവസാനിക്കാനിരിക്കെയാണ് ആക്രമണം.
സംഭവം അറിഞ്ഞതോടെ ഭക്തജനങ്ങളും നാട്ടുകാരും തടിച്ചുകൂടി. ക്ഷേത്രങ്ങള്‍ക്ക് നേരെ ഇടക്കിടെ നടക്കുന്ന ആക്രമണങ്ങള്‍ക്കെതിരെ ശക്തമായ പ്രതിഷേധമാണ് ഉയര്‍ന്നത്. ഹിന്ദുഐക്യവേദി ഹര്‍ത്താലിന് ആഹ്വാനം ചെയ്തതോടെ ജാതിമത ഭേദമന്യേ എല്ലാവരും അതില്‍ അണിചേര്‍ന്നു.
പ്രതിഷേധത്തെ തുടര്‍ന്ന് ജില്ലാ പോലീസ് മേധാവ് ദേബേഷ്‌കുമാര്‍ ബെഹ്‌റയുടെ നേതൃത്വത്തില്‍ വന്‍ പോലീസ് സന്നാഹം സ്ഥലത്തെത്തിയിരുന്നു. ഫോറന്‍സിക് വിദഗ്ധരും ഡോഗ് സ്‌ക്വാഡും തെളിവുകള്‍ ശേഖരിച്ചു.
പ്രതികരിക്കാൻ ഇവിടെ എഴുതുക: