തിരുവനന്തപുരം: മഹിജയ്ക്കെതിരായ പോലീസ് മര്ദനത്തെ ന്യായീകരിച്ച് സംസ്ഥാന സര്ക്കാര് പുറത്തിറക്കിയ പത്രപരസ്യത്തിനെതിരെ വ്യാപക പ്രതിഷേധം. ജിഷ്ണുവിന്റെ കുടുംബവും പ്രതിപക്ഷവും പൊതുസമൂഹവും പരസ്യത്തിനെതിരെ രംഗത്തെത്തി. നുണപ്രചരിപ്പിക്കാന് പൊതുപണം ചെലവാക്കുകയാണ് സര്ക്കാരെന്നും ആരോപണമുയരുന്നു.
സര്ക്കാര് നുണ പ്രചരിപ്പിക്കുകയാണെന്ന് ജിഷ്ണുവിന്റെ കുടുംബം പറഞ്ഞു. ജിഷ്ണുവിന് മര്ദ്ദനമേറ്റില്ലെന്ന സര്ക്കാര് വാദം വസ്തുതകള്ക്ക് നിരക്കാത്തതാണ്. പോലീസ് അതിക്രമം ഉണ്ടായിട്ടില്ലെന്നു കാട്ടി സര്ക്കാര് പരസ്യം നല്കിയത് ശരിയായില്ലെന്നും ജിഷ്ണുവിന്റെ അമ്മ മഹിജ പറഞ്ഞു.
പോലീസിനെ ന്യായീകരിച്ചാണ് സര്ക്കാര് പത്രപരസ്യം നല്കിയത്. ദൃശ്യങ്ങള് സത്യം വിളിച്ചു പറയുന്നു. നീതികിട്ടും വരെ സമരം തുടരുമെന്നും അവര് കൂട്ടിച്ചേര്ത്തു. തെറ്റായ രീതിയില് പരസ്യം നല്കിയവര്ക്കെതിരെ നടപടി എടുക്കണമെന്ന് ജിഷ്ണുവിന്റെ അമ്മാവന് ശ്രീജിത്ത് ആവശ്യപ്പെട്ടു. പരസ്യത്തിന്റെ ആദ്യ ഭാഗത്തില് പറഞ്ഞിരിക്കുന്ന കാര്യങ്ങള് പലതവണ തങ്ങള് വ്യക്തമാക്കിയവയാണ്. ശേഷിക്കുന്ന പകുതി അസംബന്ധമാണ്. ജിഷ്ണുവിന്റെ ബന്ധുക്കളായ 14 പേരെ വളയത്തെ സിപിഎം നേതൃത്വം രക്തഹാരമണിയിച്ചാണ് യാത്ര അയച്ചത്.
ട്രെയിനില് ടിക്കറ്റ് ബുക്ക് ചെയ്തതിന്റെ രേഖകളുണ്ട്. കോടികള് ചെലവഴിച്ച് നല്കിയ പരസ്യം അനാവശ്യമാണ്. ആ തുക പാവപ്പെട്ടവര്ക്ക് നല്കാമായിരുന്നുവെന്നും ശ്രീജിത്ത് പറഞ്ഞു.
‘ജിഷ്ണു കേസ്, പ്രചാരണമെന്ത് സത്യമെന്ത്’ എന്ന പേരിലാണ് പോലീസ് നടപടികളെ ന്യായീകരിച്ച് പത്രങ്ങളില് പിആര്ഡി പരസ്യം നല്കിയത്.
