മാതൃവിലാപങ്ങള്‍

അവന്‍

ആത്മഹത്യ ചെയ്തുവെന്ന്

അതല്ല

അവന്‍ കൊല്ലപ്പെട്ടുവെന്ന്

രണ്ടായാലും അമ്മയ്‌ക്കറിയേണ്ടത്

അവനെ ഇല്ലാതാക്കിയത്

ആരാണെന്നായിരുന്നു

അതിനായി

അമ്മ വാതിലുകളില്‍ ചെന്നു മുട്ടി

പക്ഷെ, വാതിലുകളെല്ലാം

കൊട്ടിയടയ്‌ക്കപ്പെട്ട നിലയിലായിരുന്നു

അമ്മ അപ്പോള്‍

അലമുറയിട്ടു കരഞ്ഞു …

അന്നേരമാണ് പാറാവുകാര്‍ വന്നത്

അവര്‍ അമ്മയെ പിടികൂടി

ചാട്ടവാര്‍ കൊണ്ട് തലങ്ങും വിലങ്ങും പ്രഹരിച്ചു

മുടിയില്‍ പിടിച്ച്

തെരുവിലൂടെ വലിച്ചിഴച്ചു

അതു കണ്ട ആളുകള്‍

അരുതേയെന്നു വിലപിച്ചു

അപ്പോഴാണ്

പൊന്നുതമ്പുരാന്റെ രഥം ആ വഴി വന്നത്

രഥം നിര്‍ത്തി തമ്പുരാന്‍

പാറാവുകാരോട് കല്‍പിച്ചു ..

നാടു കടത്തൂ ഈ കുലടയെ

തുറക്കാത്ത വാതിലുകളില്‍ മുട്ടി

കലാപമുണ്ടാക്കാന്‍ തുനിഞ്ഞു ഇവള്‍…

ആളുകള്‍ അതു കേട്ട് മൂക്കത്തു വിരല്‍ വച്ചു

അമ്മ മോഹാലസ്യപ്പെട്ടു വീണു

പൊന്നുതമ്പുരാന്‍ രഥം മുന്നിലേക്കെടുത്തു

അമ്മയുടെ നെഞ്ചിലൂടെ രഥചക്രങ്ങള്‍

ജര്‍മ്മനിയിലേക്കു കുതിച്ചു….

അമ്മയെ നാടുകടത്തിയിട്ടും പക്ഷെ .

ആ നിലവിളികള്‍ മാത്രം

നാടുകടന്നു പോയില്ല.