ന്യൂയോര്‍ക്ക്: സെല്‍ഫ്-ഡ്രൈവിങ് വാഹനവിപണിയില്‍ യൂബറിന് ഭീഷണിയുയര്‍ത്തി ഗൂഗിളിന്റെ സെല്‍ഫ്-ഡ്രൈവിംഗ് കാര്‍ യൂണിറ്റായ വേമോയും യുഎസ് റൈഡ്ഷെയര്‍ കമ്പനിയായ ലിഫ്റ്റും ഓട്ടോണമസ് വാഹന സാങ്കേതികവിദ്യ സംബന്ധിച്ച സഹകരണ ഉടമ്പടി ഒപ്പുവെച്ചതായി ന്യൂ യോര്‍ക് ടൈംസ് റിപ്പോര്‍ട്ട് ചെയ്തു.
പ്രാരംഭ പദ്ധതികളിലും ഉല്‍പ്പന്ന വികസന പ്രവര്‍ത്തനങ്ങളിലും വേമോയും ലിഫ്റ്റും യോജിച്ചുപ്രവര്‍ത്തിക്കും. ഇരു കമ്പനികളുടെയും പങ്കാളിത്തം ലോകത്തെ ഏറ്റവും വലിയ റൈഡ്ഷെയറിംഗ് കമ്പനിയായ യൂബറിന് തിരിച്ചടിയാകുമെന്നും പത്രം പറഞ്ഞുവെയ്‌ക്കുന്നു.
വേമോയും യൂബറും തമ്മിലുള്ള പോരാട്ടം ഇപ്പോള്‍ കോടതിയിലാണ്. തങ്ങളുടെ സെല്‍ഫ്-ഡ്രൈവിംഗ് സാങ്കേതികവിദ്യ മോഷ്ടിച്ച മുന്‍ ജീവനക്കാരന്‍ സ്ഥാപിച്ച കമ്പനിയാണ് യൂബര്‍ പിന്നീട് ഏറ്റെടുത്തതെന്നാണ് വേമോയുടെ വാദം. സ്മാര്‍ട്ട്ഫോണ്‍ ആപ്ലിക്കേഷന്‍ അടിസ്ഥാനമാക്കിയാണ് യൂബറും ലിഫ്റ്റും പ്രവര്‍ത്തിക്കുന്നത്.
പ്രതികരിക്കാൻ ഇവിടെ എഴുതുക: