കുന്നത്തൂര്: കൊല്ലം നഗരത്തിലും കുന്നത്തൂര് താലൂക്കിലും വിതരണം ചെയ്യുന്ന കുടിവെള്ളത്തില് മാലിന്യം കലരുന്നു. ശാസ്താംകോട്ട ഫില്ട്ടര്ഹൗസ് വഴി വിതരണം ചെയ്യുന്ന വെള്ളത്തിലാണ് മാംസാവശിഷ്ടങ്ങള് ഉള്പ്പടെ കലര്ന്നിരിക്കുന്നത്.
ശാസ്താംകോട്ട ഡിസ്ട്രിബ്യൂട്ടറിയിലേക്കുള്ള മെയിന് കനാലില് ശാസ്താംനടയ്ക്കും സിനിമപറമ്പിനുമിടയില് വലിയ രീതിയിലാണ് കനാല്ജലത്തില് മാലിന്യങ്ങള് കലര്ന്നിരിക്കുന്നത്. അറവുമാലിന്യങ്ങള്, ഹോട്ടല് മാലിന്യങ്ങള്, പ്ലാസ്റ്റിക്, അഴുകിയ വളര്ത്തുനായ്ക്കളുടെ മൃതദേഹങ്ങള് എന്നിവ വെള്ളത്തിലൂടെ ഒഴുകുന്ന കാഴ്ചയാണ് ഉള്ളത്. മാലിന്യം കെട്ടികിടക്കുന്നത് മൂലം പ്രദേശത്ത് ദുര്ഗന്ധവും അനുഭവപ്പെടുന്നുണ്ട്. അതിനിടയില് കരാറുകാരുടെ മാലിന്യംനീക്കലും പ്രഹസനമായി. മാലിന്യങ്ങള് കോരിമാറ്റാതെ തടസം നീക്കി ഒഴുക്കിവിടുകയാണ് കരാറുകാര് ചെയ്യുന്നത്. ഇത് മറ്റു ടണലുകളില് വീണ്ടും അടിഞ്ഞുകൂടാന് ഇടയാകുന്നു. കനാല് ജലം കുടിവെള്ളമായി എടുക്കുന്നതിന് മുന്നോടിയായി കനാലില് മാലിന്യനിക്ഷേപം തടയുന്നതിനായി നെറ്റ് സ്ഥാപിക്കുമെന്നാണ് സൂചന.
