തൃശൂര്: വര്ണവിസ്മയം കൂടിയാണ് തൃശൂര്പൂരം. പൂരത്തിന് വര്ണ ചാരുത പകരുന്നതില് പ്രധാനം കുടമാറ്റംതന്നെ. തെക്കെഗോപുരനടയില് അഭിമുഖമായി നിരക്കുന്ന തിരുവമ്പാടി – പാറമേക്കാവ് വിഭാഗങ്ങള് മത്സരിച്ച് കുടകള് ഉയര്ത്തുന്നതോടെ പൂരനഗരിയിലെ ജനസാഗരം ആവേശത്തിരകള് ഉയര്ത്തും.
ഇക്കുറിയും പൂരത്തിനുള്ള കുടകള് ഇരുവിഭാഗത്തിന്റേയും അണിയറയില് ഒരുങ്ങിക്കഴിഞ്ഞു. അവസാന മിനുക്കുപണികളിലാണ് തിരുവമ്പാടി-പാറമേക്കാവ് സംഘങ്ങള്.
പാറമേക്കാവിന് വേണ്ടി പതിവുകാരനായ സുന്ദരന് തന്നെയാണ് ഇക്കുറിയും കുടയൊരുക്കുന്നത്. മാസങ്ങള്ക്ക് മുമ്പേ ഇതിനായുള്ള ഒരുക്കങ്ങള് തുടങ്ങും. ഇക്കുറി ഗുജറാത്ത്, മുംബൈ, കര്ണാടക തുടങ്ങിയ ഇടങ്ങളില് നിന്നാണ് സ്പെഷല് കുടകള്ക്ക് വേണ്ട തുണികള് എത്തിച്ചത്.
സ്പെഷല് കുടകളാണ് ഇരുവിഭാഗത്തിന്റേയും തുരുപ്പുചീട്ട്. ഇത് എന്തൊക്കെയെന്ന് ഇപ്പോള് വെളിപ്പെടുത്തില്ല. സസ്പെന്സായി സൂക്ഷിക്കും. അതീവ രഹസ്യമായി തയ്യാറാക്കുന്ന സ്പെഷല് കുടകള് പൂരദിവസം മാത്രമാണ് പുറത്തെടുക്കുക.
പുരാണ കഥാപാത്രങ്ങളുടെ രൂപങ്ങള്, പ്രകൃതി ദൃശ്യങ്ങള്, ഭഗവദ് രൂപങ്ങള് തുടങ്ങിയവയൊക്കെ മുന്കാലങ്ങളില് കുടകളായി പ്രത്യക്ഷപ്പെട്ടിട്ടുണ്ട്. ഇക്കുറിയും എന്ത് അത്ഭുതമാണ് കാത്തുവെച്ചിരിക്കുന്നതെന്ന ആകാംക്ഷയിലാണ് പൂരപ്രേമികള്.
