പുതുക്കാട്: പുതുക്കാട് മേഖലയില് നിന്നും വ്യാപകമായി നേന്ത്രവാഴക്കുലകള് മോഷ്ടിച്ച പതിനഞ്ച്കാരിയടക്കം ഒരു കുടുംബത്തിലെ മൂന്ന് പേരെ പുതുക്കാട് പോലീസ് അറസ്റ്റ് ചെയ്തു.മുപ്ലിയം വെള്ളാരംപാടത്ത് വാടകക്ക് താമസിക്കുന്ന ചങ്ങനാശ്ശേരി ചെറുകുന്നേല് അജികുമാര് (38),ഇയാളുടെ രണ്ടാം ഭാര്യ ഗോവിന്ദാപുരം ഊര്ക്കളക്കാട് ധനഭാഗ്യം,ധനഭാഗ്യത്തിന്റെ പതിനഞ്ച് വയസ്സുള്ള മകള് എന്നിവരെയാണ് പോലീസ് അറസ്റ്റ് ചെയ്തത്.
മോഷ്ടിച്ച വാഴക്കുലകള് വില്പന നടത്തി കിട്ടിയ പണം കൊണ്ട് വാങ്ങിയ പുതിയ സ്കൂട്ടറും വാഴക്കുലകള് കടത്താന് ഉപയോഗിച്ച കാറും പോലീസ് കസ്റ്റഡിയിലെടുത്തു. നാല് മാസമായി പുതുക്കാട്, നെല്ലായി മേഖലകളിലെ തോട്ടങ്ങളില് നിന്ന് വ്യാപകമായി വാഴക്കുലകള് ഇവര് മോഷണം നടത്തിയിരുന്നു.നെല്ലായി, നന്തിക്കര,ചെങ്ങാലൂര്,കുറുമാലി, കൊളത്തൂര് എന്നിവിടങ്ങളിലെ തോട്ടങ്ങളില് നിന്നായി മൂന്നൂറോളം നേന്ത്രക്കുലകളാണ് ഇവര് മോഷ്ടിച്ചത്.പകല് സമയത്ത് വന്ന് അജികുമാറും പതിനഞ്ച്കാരിയും കൂടി മോഷണം നടത്താനുള്ള വാഴതോട്ടങ്ങള് കണ്ടെത്തുകയും പിന്നീട് രാത്രിയില് ആയുധങ്ങളുമായി എത്തി മുറിച്ചുകൊണ്ടുപോവുകയാണ് പതിവ്.
അരിവാള് തോട്ടി ഉപയോഗിച്ച് അജികുമാര് മുറിച്ചിടുന്ന കുലകള് ധനഭാഗ്യവും മകളും ചേര്ന്നാണ് കാറില് എത്തിക്കുന്നത്.മോഷ്ടിച്ച കുലകള് ചാലക്കുടി മുതല് ആലുവ വരെയുള്ള ചെറിയ കടകളിലും പാലക്കാടുള്ള ഒരു കടയിലുമാണ് ഇവര് വില്പന നടത്തിയിരുന്നത്. കൊളത്തൂരുള്ള കര്ഷകന് പോലീസിന് നല്കിയ ഒരു കാറിന്റെ നമ്പറാണ് മോഷണം നടത്തിയവരിലെത്താന് പോലീസിന് സഹായകമായത്.പിന്നീട് മോഷണം നടന്ന പ്രദേശങ്ങളിലുള്ള സിസിടിവി കാമറകളും പോലീസ് പരിശോധിച്ചിരുന്നു.പരിശോധനയില് ഇവരുടെ കാര് കണ്ടതിനെ തുടര്ന്ന് പോലീസ് നിരീക്ഷിച്ച് വരികയായിരുന്നു.
വ്യാഴാഴ്ച്ച പുലര്ച്ചെ നെല്ലായി ഇറിഗേഷന് സമീപം തോട്ടത്തില് നിന്ന് നേന്ത്രവാഴക്കുലകള് മോഷ്ടിക്കുന്നതിനിടെയാണ് മൂന്നു പേരെയും പോലീസ് പിടികൂടിയത്. പാലക്കാട് ജില്ലയിലെ കൊല്ലംകോട് മേഖലകളില് നിന്നും ഇവര് വാഴക്കുലകള് മോഷണം നടത്തിയിരുന്നു.മോഷ്ടിച്ച കുലകളുമായി വാഹനത്തില് വരുന്നതിനിടെ സംശയം തോന്നിയ പുതുനഗരം പോലീസ് ഇവരെ തടഞ്ഞു നിര്ത്തി ചോദ്യം ചെയ്തിരുന്നു.
ധനഭാഗ്യത്തിന്റെ ഉടമസ്ഥതയിലുള്ള ഗോവിന്ദാപുരത്തുള്ള പറമ്പിലെ വാഴക്കുലകളാണെന്ന് പറഞ്ഞ് പോലീസിനെ തെറ്റിദ്ധരിപ്പിച്ചാണ് ഇവര് അന്ന് രക്ഷപ്പെട്ടത്.പിന്നീട് ഇരുപത് ദിവസം മുന്പാണ് ഇവര് വെള്ളാരംപാടത്ത് വാടകക്ക് താമസം ആരംഭിച്ചചത്.പിടികൂടിയ പ്രതികളെ നന്തിക്കരയിലെ വാഴ തോട്ടത്തില് കൊണ്ടുവന്ന് തെളിവെടുപ്പ് നടത്തി. പുതുക്കാട് സിഐ പി.എസ്.സുധീരന്, എസ്ഐ വി.സജീഷ്കുമാര് എന്നിവരുടൈ നേതൃത്വത്തിലുള്ള സംഘമാണ് പ്രതികളെ അറസ്റ്റ് ചെയ്തത്.പ്രതികളെ വ്യാഴാഴ്ച കോടതിയില് ഹാജരാക്കി.
