തിരുവനന്തപുരം: വിമാനത്താവളത്തിന്റെ പേരില് ഇല്ലാതാക്കാന് ശ്രമിച്ച ആറന്മുള പാടശേഖരത്ത് കൊയ്തെടുത്ത അരി, ആറന്മുളയുടെ സമരനായികയായ സുഗതകുമാരി ടീച്ചര്ക്ക് കൃഷിമന്ത്രി അഡ്വ. വി.എസ്.സുനില്കുമാര് സമ്മാനമായി നല്കി. കഴിഞ്ഞ മാസം കൊയ്ത്ത് കഴിഞ്ഞ,് കുത്തിയെടുത്ത തവിടുകളയാത്ത ഒരു പറ അരിയാണ് കൃഷിമന്ത്രി സുഗതകുമാരി ടീച്ചറുടെ വീട്ടിലെത്തി നല്കിയത്. ആറന്മുള നെല്ലിന്റെ കതിര്കുലയും, ആറന്മുള അരി കൊണ്ടുണ്ടാക്കിയ പായസവും ഇതോടൊപ്പം മന്ത്രി സമ്മാനിച്ചു.
തന്റെ ജീവിതത്തില് ലഭിച്ചിട്ടുളള ഏറ്റവും മഹത്തായ ഒരു സമ്മാനമായി ഇതിനെ കണക്കാക്കുന്നു എന്ന് സുഗതകുമാരി ടീച്ചര് അഭിപ്രായപ്പെട്ടു. കേരളത്തിന്റെ ഹരിതാഭ വീണ്ടെടുക്കുന്നതില് സര്ക്കാരിന്റെ ഇടപെടലുകള് പ്രശംസനീയമാണെന്നും ടീച്ചര് പറഞ്ഞു. 443 ഹെക്ടര് വരുന്ന ആറന്മുള പാടശേഖരത്തില് 101 ഹെക്ടറാണ് ആദ്യഘട്ടത്തില് കൃഷിയിറക്കിയത്. കഴിഞ്ഞ മാസമാണ് കൃഷിമന്ത്രിയുടെയും പൊതുമരാമത്ത് വകുപ്പ് മന്ത്രി ജി സുധാകരന്റെയും നേതൃത്വത്തില് ആറന്മുള റൈസ് എന്ന നാമത്തില് ആറന്മുള അരി കൊയ്ത്തുത്സവ സമയത്ത് പുറത്തിറക്കിയത്. ആറന്മുള വളളം കളിക്കും അഷ്ടമി രോഹിണി സദ്യയ്ക്കും പ്രസ്തുത അരിയാണ് ഉപയോഗിക്കുക.
