തൃശൂര്: സര്ക്കാരിന്റെ അവഗണനക്കെതിരെ സ്കൂള് പാചകത്തൊഴിലാളികള് സമരത്തിന്. 17മുതല് 21വരെ സെക്രട്ടറിയേറ്റിന് മുന്നില് സ്കൂള് പാചകതൊഴിലാളികളുടെ 101 മണിക്കൂര് കഞ്ഞിവെപ്പ് സമരം നടക്കും. കേരളത്തിലെ സ്കൂളുകളില് ഉച്ചഭക്ഷണപദ്ധതിയുടെ ഭാഗമായി ജോലിചെയ്യുന്ന മുപ്പതിനായിരത്തിലധികം വരുന്ന പാചകതൊഴിലാളികള് കടുത്ത ദുരിതങ്ങളും പ്രയാസങ്ങളും നേരിട്ടുകൊണ്ടാണ് ജോലിയില് തുടരുന്നത്. ഇവരില് മൂന്നിലൊന്ന് തൊഴിലാളികളും സര്ക്കാരിന്റെ രേഖകളിലോ കണക്കുകളിലോ ഉള്പ്പെട്ടിട്ടില്ല. ഏതാണ്ട് മൂന്ന് മാസക്കാലം പാചകത്തൊഴിലാളികള്ക്ക് ജോലിയുമില്ല. കൂലിയുമില്ല.
ഇഎസ്ഐയോ മറ്റ് ചികിത്സാ ആനുകൂല്യങ്ങളൊ ഇവര്ക്കില്ല. പ്രോവിഡണ്ട് ഫണ്ട് തൊഴില് നിയമങ്ങള് തുടങ്ങിയവയുടെ പരിരക്ഷയും ഇവര്ക്കില്ല. ദീര്ഘകാല സേവനത്തിന്ശേഷം വിരമിക്കുമ്പോള് ഗ്രാറ്റിവിറ്റിയോ പെന്ഷനോ റിട്ടയര്മെന്റ് ആനുകൂല്യങ്ങളോ ഇല്ല.
അഞ്ഞൂറ് കുട്ടികള്ക്ക് ചോറും കറികളും ലഘുഭക്ഷണവും മറ്റും പാകം ചെയ്തു നല്കാന് ഒരു തൊഴിലാളിയെയാണ് സര്ക്കാര് അംഗീകരിച്ചിട്ടുള്ളത്. അതുകൊണ്ട് നൂറ്റിയമ്പതിന് മുകളില് കുട്ടികളുള്ള ബഹുഭൂരിപക്ഷം സ്കൂളുകളിലും അംഗീകൃത പാചകതൊഴിലാളി മറ്റൊരാളെയെങ്കിലും സഹായത്തിന് കുട്ടി ദിവസക്കൂലി പങ്കിട്ടെടുക്കുന്ന ദയനീയ സ്ഥിതിയാണ് തുടര്ന്നുവരുന്നത്. ഒരു തൊഴിലാളിയുടെ നിത്യവൃത്തിക്ക് പോലും തികയാത്ത കൂലികൊണ്ട് രണ്ട് തൊഴിലാളികളെ പണിയെടുപ്പിക്കുന്ന തൊഴില് ചൂഷണമാണ് നടക്കുന്നത്.
