കട്ടപ്പന: ആറുപതിറ്റാണ്ട് പഴക്കമുള്ള ഹൈറേഞ്ചിലെ ആദ്യകാല റോഡുകളില് ഒന്നാണ് മങ്കുവ-ഇഞ്ചത്തൊട്ടി-പനംകുട്ടി റോഡ്. മുരിക്കാശേരി, ചിന്നാര്, മങ്കുവ, പെരിഞ്ചാന്കുട്ടി എന്നിവിടങ്ങളില് നിന്നും എറണാകുളം, നേര്യമംഗലം എന്നിവിടങ്ങളിലേക്ക് എളുപ്പത്തില് എത്തിച്ചേരാന് സാധിക്കുന്ന റോഡാണിത്. കുടിയേറ്റകാലങ്ങളില് അടിമാലിയില് നിന്നും മുരിക്കാശേരിയിലേക്ക് കാല്നടയായി ഇതുവഴിയാണ് യാത്രചെയ്തിരുന്നത്. കാര്ഷിക മേഖലയില് കൂടി കടന്നുപോകുന്ന റോഡിന്റെ നിര്മ്മാണം മിക്കവാറും പൂര്ത്തിയായിക്കഴിഞ്ഞു.
എന്നാല് ഒരു കിലോമീറ്റര് ദൂരം നിര്മ്മാണം പൂര്ത്തിയാക്കിയാല് മാത്രമേ ഇതുവഴി വാഹന ഗതാഗതം സാധ്യമാകുകയുള്ളൂ. കഴിഞ്ഞ രണ്ട് ടേമുകളിലായി ഇടുക്കി എംഎല്എ രണ്ട് കോടിയോളം രൂപ മുതല് മുടക്കി അഞ്ചുകിലോമീറ്റര് ദൂരം നിര്മ്മാണം പൂര്ത്തീകരിച്ചിരുന്നു. അടുത്ത ഒരു കിലോമീറ്റര് നിര്മ്മിക്കുന്നതിനായി എംഎല്എയുടെ ആസ്തി വികസന ഫണ്ടില് നിന്നും ഒരു കോടി രൂപ അനുവദിച്ചിരുന്നു. എന്നാല് റോഡിന്റെ നിര്മ്മാണം എങ്ങും എത്തിയിട്ടില്ല. ഇഞ്ചത്തൊട്ടി മേഖലയിലുള്ളവര്ക്ക് പുറംലോകവുമായി ബന്ധപ്പെടാനുള്ള ഏക മാര്ഗമാണ് ഈ റോഡ്. പനംകുട്ടി സ്കൂള്, പോസ്റ്റോഫീസ്, ആരാധനാലയം എന്നിവിടങ്ങളിലേക്ക് ഇഞ്ചത്തൊട്ടിയിലുള്ള ജനങ്ങളും കാല്നടയായാണ് എത്തുന്നത്. അഞ്ഞൂറുമീറ്ററോളം കല്ലുപാകിയിരിക്കുന്നതിനാല് ഓട്ടോറിക്ഷ പോലും ഇതുവഴി കടന്നുപോകില്ല. എത്രയും വേഗം റോഡ് സഞ്ചാര യോഗ്യമാക്കണമെന്നാണ് ഇഞ്ചത്തൊട്ടി മേഖലയിലുള്ള ഇരുന്നൂറോളം കുടുംബങ്ങളുടെ ആവശ്യം.
