നെയ്യാറ്റിന്കര: നെയ്യാറ്റിന്കര ടിബി ജംഗ്ഷനിലുളള പിഡബ്ല്യഡി റെസ്റ്റ് ഹൗസിനോട് അനുബന്ധിച്ച് നിര്മ്മിച്ചിരിക്കുന്ന ശൗചാലയം ഒരുമാസമായി പൂട്ടിയിട്ടതിനെതിരെ സമരം ശക്തമാകുന്നു. തൊട്ടടുത്ത നാല് പിഡബ്ല്യുഡി ഓഫീസുകളില് കമ്മിറ്റികള് നടക്കുമ്പോള് ഇവിടെ വരുന്ന കരാറുകാരുള്പ്പെടെ ദിനംപ്രതി നൂറി കണക്കിന് ആള്ക്കാര് ഉപയോഗിച്ചിരുന്ന ശൗചാലയമാണ് അധികൃതര് യാതൊരു കാരണവും കൂടാതെ പൂട്ടിയിട്ടത്.കേന്ദ്ര-സംസ്ഥാന സര്ക്കാരുകള് ശൗചാലയങ്ങള് നിര്മ്മിക്കാന് നിയമങ്ങള് നടപ്പിലാക്കുമ്പോഴാണ് നെയ്യാറ്റിന്കരയിലുളള പിഡബ്ല്യുഡി അധികൃതര് പൊതുജനങ്ങള് ഉപയോഗിച്ചിരുന്ന ശൗചാലയം അടച്ചു പൂട്ടിയത്.
ഈ ശൗചാലയം എത്രയും വേഗം തുറക്കണമെന്നാവശ്യപ്പെട്ട് പൗരമുന്നണി സംസ്ഥാന പ്രസിഡന്റ് മാമ്പഴക്കര സോമന്റെ നേതൃത്ത്വത്തില് കഴിഞ്ഞദിവസം ശൗചാലയത്തിനു മുന്നില് നില്പ്പ് സമരം സംഘടിപ്പിച്ചു. സമരത്തില് നെയ്യാറ്റിന്കര സത്യശീലന് , ക്രിസ്തുദാസ് , സാജന് , ആനപ്പാറ ചന്ദ്രിക തുടങ്ങിയവര് പങ്കെടുത്തു. ശൗചാലയം പൊതുജനങ്ങള്ക്കായി തുറക്കാതിരുന്നാല് വരും ദിവസങ്ങളില് ശൗചാലയത്തിനു മുന്നില് നിരാഹാരസമരം നടത്തുമെന്ന് മാമ്പഴക്കര സോമന് അറിയിച്ചു.
