തിരൂര്‍: വെട്ടം പടിയം സ്വദേശിയും ഒബിസി മോര്‍ച്ചയുടെ മണ്ഡലം കമ്മിറ്റിയംഗവുമായ പടിഞ്ഞാറെപുരക്കല്‍ പ്രദീപിനെ വെട്ടിക്കൊല്ലാന്‍ ശ്രമിച്ച കേസിലെ പ്രതികളെ പിടികൂടാന്‍ പോലീസ് മടിക്കുന്നു. പ്രതികളെ കുറിച്ച് വ്യക്തമായ അറിവുണ്ടായിട്ടും അന്വേഷണ ഉദ്യോഗസ്ഥര്‍ ഇവരെ കസ്റ്റഡിയിലെടുക്കാത്തത് പ്രതിഷേധത്തിന് കാരണമാകുന്നുണ്ട്. പുല്ലവളപ്പില്‍ രാജു, ചേമ്പീട്ടില്‍ ബൈജു, വാളേങ്ങല്‍ ഷിബു, തറയില്‍ പ്രണേഷ്, രാമനത്ത് ഷിബിന്‍കുമാര്‍, നായക്കര രാഹുല്‍, രാമനത്ത് ശ്രീരാഗ, കണിയാംപറമ്പില്‍ ജിനീഷ് എന്നിവരാണ് തന്നെ ആക്രമിച്ചതെന്ന് പ്രദീപ് മൊഴികൊടുത്തിരുന്നു. പക്ഷേ ഇതുവരെ നടപടികളൊന്നുമായിട്ടില്ല.
കഴിഞ്ഞ ദിവസം രാത്രി കടയടച്ച് വീട്ടിലേക്ക് വരുന്ന വഴി പടിയം സ്റ്റേഡിയത്തിന്റെ സമീപത്ത് വെച്ചാണ് പ്രദീപിനെ വെട്ടിക്കൊല്ലാന്‍ ശ്രമിച്ചത്.
സിപിഎം ബ്രാഞ്ച് സെക്രട്ടറിയും 15-ാം വാര്‍ഡ് മെമ്പറുടെ ഭര്‍ത്താവുമായ രാജുവിന്റെ നേതൃത്വത്തിലുള്ള സംഘമാണ് ആക്രമിച്ചത്. രാജു ഇരുമ്പുദണ്ഡ് ഉപയോഗിച്ച് തലക്ക് അടിച്ചു വീഴ്‌ത്തി. തുടര്‍ന്ന് ഷിബുവും ബൈജുവും വാള്‍ ഉപയോഗിച്ച് മാരകമായി വെട്ടിപരിക്കേല്‍പിക്കുകയും, ആണി അടിച്ച പട്ടികയും ഇരുമ്പ് പൈപ്പും ഉപയോഗിച്ച് മര്‍ദ്ദിക്കുകയുമായിരുന്നു. ഗുരുതരമായി പരിക്കേറ്റ പ്രദീപ് ഇപ്പോള്‍ കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.
പ്രതികരിക്കാൻ ഇവിടെ എഴുതുക: