പരപ്പനങ്ങാടി: സിപിഎം ഏകപക്ഷീയ അക്രമങ്ങള്‍ തുടര്‍ക്കഥയാകുന്നു. വള്ളിക്കുന്ന് ആനങ്ങാടി രവിമംഗലം ക്ഷേത്രത്തിന് സമീപം മുതിരക്കാലായില്‍ സനലിനെ സിപിഎം അക്രമിസംഘം കഴിഞ്ഞ ദിവസം വെട്ടിപരിക്കേല്‍പ്പിച്ചു.
സനല്‍ രവിമംഗലം ശാഖാ മുഖ്യശിക്ഷക് ആണ്. പരിക്കേറ്റ സനലിനെ തിരുരങ്ങാടി താലൂക്ക് ആശുപത്രിയില്‍ പ്രവേശിപ്പിച്ചു. രാത്രി എട്ടരയോടെ സിപിഎം പ്രവര്‍ത്തകനായ സുര്‍ജിത് ക്ഷേത്ര ഓഫീസില്‍ നിന്നും വിളിച്ചിറക്കി റോഡിലേക്ക് എത്തിക്കുകയായിരുന്നു. മറഞ്ഞു നിന്ന പത്തോളം വരുന്ന അക്രമികള്‍ സനലിന്റെ പുറത്ത് വെട്ടുകയായിരുന്നു. താഴെ വീണ സനലിനെ കമ്പിപാരകളും ഇരുമ്പുദണ്ഡുകളും കൊണ്ട് മാരകമായി അക്രമിച്ചു. ശബ്ദംകേട്ട് ഓടികൂടിയ നാട്ടുകാരാണ് തക്ക സമയത്ത് ആശുപത്രിയിലെത്തിച്ചത്.
ഓടി രക്ഷപ്പെടുന്നതിനിടെ അക്രമിസംഘം തൊട്ടടുത്ത് അമ്മയും മകളും മാത്രമുണ്ടായിരുന്ന വീട് തകര്‍ത്തു. ജനവാതിലുകളും ഓടിട്ട മേല്‍ക്കൂരയും കല്ലെറിഞ്ഞു തകര്‍ത്തു.
തുടര്‍ന്ന് വള്ളിക്കുന്ന് ജംഗ്ഷന്‍ വരെയുള്ള ബിജെപി, ആര്‍എസ്എസ് പ്രചരണ ബോര്‍ഡുകളും കൊടികളും ബസ്സ് സ്റ്റോപ്പും നശിപ്പിച്ചു. സനലിന്റെ മൊബൈല്‍ ഫോണും പഴ്‌സും അക്രമികള്‍ കവര്‍ന്നു. പരാതി നല്‍കിയിട്ടും സനലിന്റെ മൊഴി രേഖപ്പെടുത്താന്‍ പോലീസ് തയ്യാറായില്ല. പകരം സിപിഎമ്മുകാരുടെ പരാതിയിന്മേല്‍ സനലിനെതിരെ വധശ്രമത്തിന് കേസെടുത്തിരിക്കുകയാണ്.
പ്രതികരിക്കാൻ ഇവിടെ എഴുതുക: