ചിക്കൻ കൊടുത്തില്ല; സഹപാഠി വിദ്യാർത്ഥിനിയുടെ നേർക്ക് തോക്ക് ചൂണ്ടി

ന്യൂയോർക്ക്: ചിക്കൻ വിഭവം തരാത്തതിൽ പ്രതിഷേധിച്ച സ്കൂൾ വിദ്യാർത്ഥി സഹപാഠിയായ പെൺകുട്ടിയുടെ നേർക്ക് തോക്ക് ചൂണ്ടി. ന്യൂയോർക്കിലെ മക്ഡൊണാൾഡിന്റെ ഔട്ട്ലൈറ്റിലാണ് കൗതുകവും ഞെട്ടിക്കുന്നതുമായ സംഭവം അരങ്ങേറിയതെന്ന് ബിബിസി റിപ്പോർട്ട് ചെയ്തു.

മക്ഡൊണാൾഡ് ഔട്ട്ലൈറ്റിൽ എത്തിയ ഇരുവരും ചിക്കൻ വിഭവം വാങ്ങി. എന്നാൽ കൊതി സഹിക്കാൻ വയ്യാതായതോടെ ആൺകുട്ടി വിദ്യാർത്ഥിനിയോട് ചിക്കൻ ആവശ്യപ്പെടുകയായിരുന്നു. തരില്ല എന്ന് പറഞ്ഞതോടെ ആൺകുട്ടി കൈയ്യിൽ കരുതിയിരുന്ന തോക്ക് ചൂണ്ടി ഭീഷണിപ്പെടുത്തുകയായിരുന്നു.

പേടിച്ച് പോയ പെൺകുട്ടി ഓടി റെയിൽവെ സ്റ്റേഷനിലേക്ക് പോയെങ്കിലും വിദ്യാർത്ഥി പിന്തുടർന്നു. തുടർന്ന് തലയ്‌ക്ക് നേരെ തോക്ക് ചൂണ്ടിയെങ്കിലും പെൺകുട്ടി തോക്ക് തട്ടിമാറ്റി ട്രെയിനിൽ കയറി രക്ഷപ്പെട്ടു. പെൺകുട്ടിയുടെ പരാതിയിൽ പോലീസ് ആൺകുട്ടിയെ കസ്റ്റഡിയിൽ എടുത്തെങ്കിലും നൽകിയ മൊഴി പരസ്പര വിരുദ്ധമായിരുന്നു. എന്തായാലും പോലീസ് കേസ് എടുത്ത് അന്വേഷണം തുടങ്ങി.