ന്യൂദല്ഹി: ഇന്ത്യന് മാധ്യമരംഗത്തെ സെന്സേഷണല് ആങ്കര് അര്ണബ് ഗോസ്വാമി ചെറിയ ഇടവേളയ്ക്ക് ശേഷം വീണ്ടും തന്റെ കര്മ മേഖലയില് സജീവമാകാന് ഒരുങ്ങുന്നു. ഇത്തവണ തന്റെ പുതിയ ചാനലുമായാണ് ഗോസ്വാമിയുടെ വരവ്.
റിപ്പബ്ലിക് എന്ന് പേരിട്ടിരിക്കുന്ന ചാനല് അധികം താമസിയാതെ പ്രവര്ത്തനം ആരംഭിക്കുമെന്നാണ് വിവരം. ചാനലിന്റെ കൂടുതല് വിശദാംശങ്ങള് കുറച്ച് ദിവസങ്ങള്ക്കുള്ളില് പുറത്തുവിടുമെന്ന് അര്ണബ് പറഞ്ഞു. ദേശീയ മാധ്യമമായ ടൈംസ് നൗ ചാനലിന്റെ ചീഫ് എഡിറ്ററായിരുന്ന അര്ണബ് കഴിഞ്ഞ മാസമാണ് സ്ഥാനം രാജിവെച്ചത്.
ടൈംസ് നൗ ചാനലിലെ രാത്രി ചര്ച്ചയായ ന്യൂസ് അവര് ഡിബേറ്റിലൂടെ മാധ്യമ രംഗത്ത് തന്റേതായ ശൈലി അവലംബിച്ച വ്യക്തിയാണ് അര്ണബ്.
ആക്രമണാത്മക രീതിയിലുള്ള അവതരണം അര്ണബിന് ആരാധകരേയും വിമര്ശകരേയും ഒരുപോലെ സമ്മാനിച്ചു. പൊടുന്നനെയുള്ള അര്ണബിന്റെ രാജി ആരാധകരെ വളരെയേറെ നിരാശരാക്കിയിരുന്നു. ആ നിരാശയാണ് ഇപ്പോള് റിപ്പബ്ലിക്കിലൂടെ വഴിമാറിയിരിക്കുന്നത്. മുംബൈ ആസ്ഥാനമാക്കി ആയിരിക്കും റിപ്പബ്ലിക് ചാനല് പ്രവര്ത്തിക്കുക എന്നാണ് വിവരം.
ഒരു ടിവി ഡിസ്ട്രിബ്യൂഷന് നെറ്റ് വര്ക്കും മീഡിയ ഗ്രൂപ്പും പുതിയ സംരംഭത്തില് അര്ണബിന് ഒപ്പമുണ്ട്. അടുത്ത വര്ഷം നടക്കുന്ന ഉത്തര്പ്രദേശ് നിയമസഭാ തെരഞ്ഞെടുപ്പിന് മുന്പ് ചാനല് പ്രവര്ത്തനം ആരംഭിക്കുമെന്നാണ് റിപ്പോര്ട്ടുകള് സൂചിപ്പിക്കുന്നത്. 1995 ലാണ് അര്ണബ് മാധ്യമപ്രവര്ത്തന രംഗത്തേക്ക് വരുന്നത്. തുടര്ന്ന് ടെലഗ്രാഫ്, എന്ഡിടിവി എന്നീ സ്ഥാപനങ്ങളില് പ്രവര്ത്തിച്ചു. തുടര്ന്ന് ടൈംസ് നൗവിലെത്തിയ അര്ണബ് 2006 ല് എഡിറ്റര് ഇന് ചീഫ് ആയി. പത്തുവര്ഷത്തോളം ആ സ്ഥാനം അലങ്കരിച്ച ശേഷമാണ് അദ്ദേഹം പടിയിറങ്ങിയത്.
