നെടുമ്പാശ്ശേരി: ദേശം കുറീസ് ചിട്ടി തട്ടിപ്പിന്റെ രണ്ടാം വാര്ഷികത്തോടനുബന്ധിച്ച് ആക്ഷന് കൗണ്സലിന്റെ ആഭിമുഖ്യത്തില് ദേശം കുന്നുംപുറത്ത് തട്ടിപ്പിനിരയായവര് പ്രതിഷേധ പ്രകടനവും യോഗവും സംഘടിപ്പിച്ചു. ദേശം കുറീസിലെ ഒളിവ് മുതല് കണ്ടെടുത്ത്, സുനില് ദേവസിയേയും കൂട്ടാളികളേയും തുറങ്കിലടക്കണമെന്നുമാവശ്യപ്പെട്ടായിരുന്നു പ്രതിഷേധം. ആക്ഷന് കൗണ്സില് രക്ഷാധികാരി പി.എ. നിഹ്മത്തുല്ല ഉദ്ഘാടനം ചെയ്തു. ജനറല് കണ്വീനര് മൂസ പാറോത്ത് മുഖ്യപ്രഭാഷണം നടത്തി. എം.എ.ഭുവനേശ്വര് അധ്യക്ഷത വഹിച്ചു. എം.വി.ഭാസ്കരന്, എം.എ.അലി, വിജയലക്ഷ്മി, ശ്രീവിദ്യ ബൈജു, മഞ്ജു സാബു തുടങ്ങിയവര് സംസാരിച്ചു. തട്ടിപ്പിനിരയായവര്ക്ക് നിയമ സഹായം നല്കുമെന്ന് മൂസ പാറോത്ത് പറഞ്ഞു.
18 കോടിയുടെ തട്ടിപ്പ് നടത്തി 2014 ഡിസംബര് 14നാണ് ദേശം കുന്നുംപുറത്തെ ചിട്ടി കമ്പനി അടച്ച് പൂട്ടിയത്. ചിട്ടി അവസാനിച്ചവരെയും, സ്ഥിര നിക്ഷേപ പദ്ധതിയില് അടക്കം നിക്ഷേപിച്ച നൂറ് കണക്കിന് ചിറ്റാളന്മാരെയും വഞ്ചിച്ച് സ്ഥാപനയുടമ ദേശം കുന്നുംപുറം സ്വദേശി സുനില് ദേവസിയും കൂട്ടാളികളുമാണ് രണ്ട് വര്ഷം മുമ്പ് മുങ്ങിയത്. തട്ടിപ്പിനിരയായവര് ദേശം കുറീസ് ആക്ഷന് കൗണ്സില് ജനറല് കണ്വീനര് മൂസ പാറോത്തിന്റെ നേതൃത്വത്തില് വീട് ഉപരോധം, പോലീസ് സ്റ്റേഷന് മാര്ച്ച് അടക്കമുള്ള പ്രതിഷേധങ്ങളും, നിയമ നടപടികളും നടത്തുന്നുണ്ടെങ്കിലും യാതൊരു പരിഹാരവും ഉണ്ടായിട്ടില്ല.
ചിട്ടി കമ്പനി പൊളിഞ്ഞതോടെ ആസ്തി വകകളില് നിന്ന് ചിറ്റാളന്മാരുടെ പണം നല്കാന് ഉടമ തുടക്കത്തില് തയ്യാറായി വന്നതാണ്. എന്നാല് ചില ഉന്നത പോലീസുദ്യോഗസ്ഥരുടെയും, അഭിഭാഷകരുടെയും നിയമോപദേശങ്ങളാണ് പണം കിട്ടാതിരിക്കാന് കാരണമായിട്ടുള്ളതെന്ന് മൂസ പാറോത്ത് ചൂണ്ടിക്കാട്ടി. സാധാരണക്കാരും, അന്നന്ന് പണിയെടുത്ത് ജീവിക്കുന്ന പട്ടിണി പാവങ്ങളുമാണ് പ്രധാനമായും തട്ടിപ്പിനിരയായിട്ടുള്ളത്. സുനില് ദേവസിയും കൂട്ടാളികളും മൂന്നാറില് റിസോര്ട്ടുകള് സ്വന്തമാക്കി ആര്ഭാട ജീവിതം നയിക്കുകയാണ്.
