കൊല്ലം: സഹകരണബാങ്കുകളുടെ മറവില് കള്ളപ്പണക്കാരെ സംരക്ഷിക്കാന് കൂട്ടുകൂടിയ ഇടത്-വലത് മുന്നണികളുടെ നിലപാടില് പ്രതിഷേധിച്ച് യുവമോര്ച്ച ജില്ലാകമ്മിറ്റിയുടെ നേതൃത്വത്തില് കളക്ട്രേറ്റിലേക്ക് പ്രതിഷേധമാര്ച്ച് നടത്തി. കെഎസ്ആര്ടിസി സ്റ്റാന്റിന് മുന്നില് നിന്നും ആരംഭിച്ച മാര്ച്ച് കളക്ട്രേറ്റ് കവാടത്തിന് മുന്നില് പോലീസ് തടഞ്ഞു. മുദ്രാവാക്യം വിളികളുമായി പ്രവര്ത്തകര് മുഖ്യമന്ത്രിയുടേയും പ്രതിപക്ഷ നേതാവിന്റേയും കോലം കത്തിച്ചു. തുടര്ന്ന് നടന്ന പ്രതിഷേധയോഗം യുവമോര്ച്ച സംസ്ഥാന വൈസ് പ്രസിഡന്റ് അഡ്വ.ആര്.എസ്.പ്രശാന്ത് ഉദ്ഘാടനം ചെയ്തു.
കേരളത്തിലെ സഹകരണ ബാങ്കുകളില് കള്ളപ്പണം ഉള്ളതുകൊണ്ടാണ് ആദായനികുതി വകുപ്പിനെ മുഖ്യമന്ത്രി പിണറായി വിജയന് ഭയക്കുന്നതെന്ന് പ്രശാന്ത് പറഞ്ഞു. കള്ളപ്പണക്കാരുടെ സര്ക്കാരാണ് ഇടതുപക്ഷമെന്ന് പരസ്യമായി സമ്മതിച്ചിരിക്കുകയാണ് പിണറായി വിജയന്. പണം പങ്കിടുന്ന ഭരണമാണ് കേരളത്തില് എക്കാലത്തുമുള്ളത് എന്നതിന്റെ തെളിവാണ് കള്ളപ്പണക്കാരെ സംരക്ഷിക്കുന്ന സര്ക്കാര് നിലപാടിന് പിന്തുണ അറിയിച്ച് യുഡിഎഫ് രംഗത്തെത്തിയതെന്നും അദ്ദേഹം പറഞ്ഞു.
സമാന്തര സമ്പദ്വ്യവസ്ഥ സൃഷ്ടിക്കാന് ശ്രമിച്ച കള്ളപ്പണക്കാര്ക്ക് എതിരെയുള്ള സ്വച്ഛ് ഭാരതാണ് പ്രധാനമന്ത്രി നടപ്പാക്കിയത്. കേരളത്തിലെ സഹകരണബാങ്കുകളില് കോടിക്കണക്കിന് കള്ളപ്പണം സൂക്ഷിച്ചിട്ടുണ്ട്. രാജ്യനന്മയ്ക്ക് വേണ്ടി മാത്രം പ്രവര്ത്തിക്കുന്ന പ്രധാനമന്ത്രിക്കെതിരെ ദുഷ്പ്രചരണം നടത്തുന്ന ഇടതുവലത് മുന്നണികളെ ജനം തിരിച്ചറിഞ്ഞു കഴിഞ്ഞു. ലോകം മുഴുവന് തീരുമാനത്തെ അംഗീകരിക്കുമ്പോള് കേരളത്തില് സര്ക്കാര് തന്നെ ജനങ്ങളെ പരിഭ്രാന്തരാക്കുന്നുവെന്ന് അദ്ദേഹം പറഞ്ഞു.
ജില്ലാ പ്രസിഡന്റ് ടി.വി. സനില്, ജനറല് സെക്രട്ടറിമാരായ വി.എസ്. ജിതിന് ദേവ്, കൃഷ്ണകുമാര് എന്നിവര് സംസാരിച്ചു. ജില്ലാ ഭാരവാഹികളായ വിഷ്ണു പട്ടത്താനം, രാജ് മോഹന് വാളത്തുംഗല്, ശ്രേയസ്സ്, വിശാഖ് ചാത്തിനാംകുളം, ബിനു ആലാട്ട്കാവ്, ആര്യ സതീശ്, രതീഷ് ഇരണൂര്, രാജേഷ് തേവലക്കര, കൃഷ്ണകുമാര്, രഞ്ജിത് റാം, അഭിഷേക്, ദിനു തുടങ്ങിയവര് നേതൃത്വം നല്കി.
