കണ്ണൂര്: കേരള ഫോക്ലോര് അക്കാദമിയുടെ ആഭിമുഖ്യത്തില് കേരളത്തിലാദ്യമായി കണ്ണൂരില് സംഘടിപ്പിച്ച ഇന്ത്യന് വംശീയ ചിത്രകലകളുടെയും കരകൗശലവിദ്യയുടെയും ശില്പശാല ശ്രദ്ധേയമാകുന്നു. കണ്ണൂര് ടൗണ് സ്ക്വയറില് പ്രത്യേകം സജ്ജീകരിച്ചിട്ടുള്ള നാല്പത് സ്റ്റാളുകളിലായി നടക്കുന്ന വംശീയ മേളയില് കലാകാരന്മാര്ക്കൊപ്പം വംശീയ കലകള് പഠിക്കുന്നതിനായി താല്പര്യമുള്ളവര്ക്കും അവസരം നല്കിയിട്ടുണ്ട്.
15ന് മന്ത്രി കടന്നപ്പള്ളി രാമചന്ദ്രന്റെ അധ്യക്ഷതയില് മന്ത്രി എ.കെ.ബാലനാണ് മേള ഉദ്ഘാടനം ചെയ്തത്. 23 വരെ സംസ്ഥാന-അന്തര്സംസ്ഥാന നാടോടി ആദിവാസി നൃത്താവതരണം തുടരും. 16ന് പരിസ്ഥിതിയും ഫോക്ലോറും സെമിനാര്, 17ന് സാംസ്കാരിക സമ്മേളനം, 18ന് നാട്ടുവഴക്കം സെമിനാര്, 19ന് ഫോക്ലോറും ചിത്രകലയും സെമിനാര് ഇന്നലെ ചിത്രശില്പകല പാരമ്പര്യവും ആധുനികതയും സെമിനാര് എന്നിവ നടന്നു. ഇന്ന് നമുക്ക് ജാതിയില്ല സെമിനാര്, 22ന് നാടന് പാട്ട് സെമിനാര്, 23ന് മലയാളഭാഷാ സമ്മേളനം സെമിനാര് എന്നിവ നടക്കും. 24ന് നടക്കുന്ന സമാപന സമ്മേളനം സൗത്ത് സോണ് കള്ച്ചറല് സെന്റര് ഡയറക്ടര് ഇ.എന്.സജിത്ത് ഉദ്ഘാടനം ചെയ്യും. എല്ലാ ദിവസങ്ങളിലും നിരവധി ആള്ക്കാരാണ് ശില്പശാലയില് പങ്കെടുക്കാനെത്തുന്നത്. വൈകിട്ട് നടക്കുന്ന നാടോടി നൃത്ത പരിപാടികളിലും കലാപരിപാടികളിലും ഏറെ ജനപ്രാതിനിധ്യമുണ്ട്.
