ആലത്തൂര്‍: കാരുണ്യ ഫാര്‍മസികളില്‍ നിന്ന് അര്‍ബുദ രോഗികള്‍ക്ക് ആവശ്യമായ സൗജന്യ മരുന്ന് വിതരണം നിലച്ചു. ട്രാസ്റ്റുസുമാബ് എന്ന മരുന്നാണ് ഒരു മാസത്തോളമായി സര്‍ക്കാര്‍ മെഡിക്കല്‍ കോളജുകളില്‍ പോലും കിട്ടാനില്ലാത്തത്. കീമോ തെറാപ്പിക്കുള്ള ഈ മരുന്നിന്റെ ബില്ല് കാരുണ്യ ബെനവലന്റ് ഫണ്ടിലേക്ക് നല്‍കുകയും കാരുണ്യ ഫാര്‍മസി വഴി മരുന്ന് അനുവദിക്കുകയുമാണ് ചെയ്തിരുന്നത്.
മെഡിക്കല്‍ സര്‍വ്വീസസ് കോര്‍പ്പറേഷനാണ് കാരുണ്യ ഫാര്‍മസിയിലേക്ക് മരുന്ന് നല്‍കുന്നത്. ഈ ഇനത്തില്‍ 14 കോടി രൂപ കുടിശ്ശികയായതിനാലാണ് മരുന്ന് വിതരണം നിര്‍ത്തിവെച്ചത്. ഒരു കോഴ്‌സ് മരുന്നിന് 44,000 രൂപ വിലയുണ്ട്. മരുന്ന് വിതരണം നിലച്ചത് രക്താര്‍ബുദത്തിന് ചികിത്സ തേടുന്നവരെയാണ് കൂടുതലായി ബാധിച്ചത്.
ടിച്ച മരുന്ന് സൗജന്യമായി കിട്ടിയിരുന്നത് രോഗികള്‍ക്ക് ഏറെ ആശ്വാസകരമായിരുന്നു. പലര്‍ക്കും ചികില്‍സ മുടങ്ങുന്ന സാഹചര്യമാണ്.
പണം കടംവാങ്ങി പുറത്തു നിന്ന് വാങ്ങാമെന്ന് വെച്ചാലും എല്ലാ മരുന്നുഷാപ്പിലും ഈ മരുന്ന് കിട്ടില്ല. ഒരാഴ്ച മുതല്‍ മൂന്ന് ആഴ്ചവരെ ഇടവേളയില്‍ 13 തവണയായി ഉപയോഗിക്കേണ്ടുന്ന മരുന്നാണ് ട്രാസ്റ്റുസുമാബ്.
തൃശൂര്‍, കോഴിക്കോട്, കോട്ടയം, ആലപ്പുഴ മെഡിക്കല്‍ കോളജ് ആശുപത്രികളില്‍ കുടിശ്ശിക ഭാഗികമായി അടയ്‌ക്കാമെന്ന ഉറപ്പില്‍ താല്‍ക്കാലികമായി മരുന്ന് വിതരണം തുടരുന്നുണ്ട്. എന്നാല്‍ ഉയര്‍ന്ന വിലയുള്ള ട്രാസ്റ്റുസുമാബ് മരുന്നിന്റെ വിതരണം പുനരാരംഭിച്ചിട്ടില്ല.
സര്‍ക്കാര്‍ ഫണ്ട് ലഭ്യമാക്കുകയും മരുന്ന് ലഭ്യത ഉറപ്പാക്കുകും ചെയ്താലേ കൊടിയ വേദനയും ദുരിതവും അനുഭവിക്കുന്ന അര്‍ബുദ രോഗികള്‍ക്ക് ചികിത്സ തുടരാനാകൂ. അര്‍ബുദ രോഗ ചികില്‍സയുള്ള സ്വകാര്യ ആശുപത്രികളിലെ ഫാര്‍മസിയിലും ഇതിന് സമീപത്തെ മെഡിക്കല്‍ ഷാപ്പുകളിലും മരുന്ന് ലഭ്യമാണ്. ഇതിന്റെ ഉയര്‍ന്ന വില പാവപ്പെട്ടവര്‍ക്കും സാധാരണക്കാര്‍ക്കും താങ്ങാവുന്നതല്ല.
പ്രതികരിക്കാൻ ഇവിടെ എഴുതുക: