വാഹനാപകടം: എട്ടുപേര്‍ക്ക് പരിക്ക്

തളിപ്പറമ്പ്: ദേശീയപാതയില്‍ ബക്കളത്ത് വാഹനാപകടത്തില്‍ എട്ട് പേര്‍ക്ക് പരിക്കേറ്റു. ടാങ്കര്‍ ലോറിയും ഇന്നോവ കാറും കൂട്ടിയിടിച്ച് അഞ്ച് പേര്‍ക്കും ഇവര്‍ അപകടത്തില്‍പ്പെട്ട് രക്ഷാപ്രവര്‍ത്തനം നടത്തുകയായിരുന്ന മൂന്നുപേര്‍ക്ക് മറ്റൊരു ലോറിയിടിച്ചുമാണ് പരിക്കേറ്റത്. ഇന്നലെ പുലര്‍ച്ചെ നാലുമണിയോടെയായിരുന്നു സംഭവം. വായാട് നിന്നും ഉറൂസില്‍ പങ്കെടുത്ത് മടങ്ങുകയായിരുന്ന മലപ്പുറം വാളാഞ്ചേരി സ്വദേശികളായ പാറക്കാട്ടില്‍ മുഹമ്മദ് കുട്ടി(62), ഫാത്തിമ(47), ഫൗസിയ(28), റംസീന(26), ഡ്രൈവര്‍ ഫിറോസ്(28) എന്നിവര്‍ക്കാണ് പരിക്കേറ്റത്. ഇതില്‍ ഫിറോസിനെ പരിയാരം മെഡിക്കല്‍ കോളേജ് ആശുപത്രിയിലും മറ്റുള്ളവരെ ലൂര്‍ദ്ദ് ആശുപത്രിയിലും പ്രവേശിപ്പിച്ചു. അപകടം കണ്ട് രക്ഷാപ്രവര്‍ത്തനം നടത്തുകയായിരുന്ന പി.കെ.മഹറൂഫ്(21), പുതിയ പുരയില്‍ മുഹമ്മദ് ശിലിബി(28), പി.കെ.മുഹമ്മദ് നിഷാദ്(21) എന്നിവര്‍ക്കാണ് ലോറിയിടിച്ച് പരിക്കേറ്റത്. ഇവരെയും ലൂര്‍ദ്ദ് ആശുപത്രിയില്‍ പ്രവേശിപ്പിച്ചു.