ആലപ്പുഴ: പഴവീട് – ഉദയാനഗര് റോഡ് തകര്ന്നുകിടക്കാന് തുടങ്ങിയിട്ട് 16വര്ഷം. ജനപ്രതിനിധികളുടെയും നഗരസഭാ അധികൃതരുടെയും അവഗണനയില് പ്രദേശവാസികള് വലയുകയാണ്. പഴവീട് വാര്ഡില് പഴവീട് ജങ്ഷനില് നിന്ന് കിഴക്കോട്ട് ഉദയാനഗറിലേക്കുള്ള മെറ്റല്റോഡാണ് വര്ഷങ്ങളായി ശാപമോക്ഷം കിട്ടാതെ കിടക്കുന്നത്.
അറുപതോളം കുടുംബങ്ങള് താമസിക്കുന്ന പ്രദേശത്തേക്കുള്ള ഏക റോഡാണിത്. തകര്ന്ന് കുണ്ടും കുഴിയുമായിക്കിടക്കുന്ന റോഡ് നന്നാക്കണമെന്ന നാട്ടുകാരുടെ മുറവിളി അധികൃതര് കേട്ടില്ലെന്ന് നടിക്കുകയാണ്. ആശുപത്രി ആവശ്യങ്ങള്ക്കുപോലും വാഹനം വിളിച്ചാല് എത്താ ത്ത ദുഃസ്ഥിതിയാണുള്ളത്. പലപ്പോഴും ഇരുചക്ര വാഹനങ്ങളിലാണ് രോഗബാധിതരെപ്പോലും പ്രധാന റോഡിലെത്തിക്കുന്നത്. മഴക്കാലത്ത് വെള്ളം നിറയുന്നതിനാല് കാല്നടപോലും അസാദ്ധ്യമായിരിക്കുകയാണ്. റോഡിനിരുവശവും കാടുപിടിച്ചു കിടക്കുന്നതിനാല് മറ്റു സ്ഥലങ്ങളില് നിന്നുള്ളവര്പോലും മാലിന്യങ്ങള് തള്ളുന്നതും ഇവിടെയാണ്.
തെരുവുനായ്ക്കളുടെയും ഇഴജന്തുക്കളുടെയും ശല്യവും രൂക്ഷമാണ്. തെരുവിളക്കുകളും പ്രകാശിക്കാറില്ല. ഒരു പ്രദേശം മുഴുവന് അവഗണനയിലായിട്ടും ജനപ്രതിനിധിയും അധികൃതരും നടപടി സ്വീകരിക്കാത്തതില് പ്രതിഷേധം ഉയര്ന്നിട്ടുണ്ട്. അധികൃതരുടെ അവഗണനയ്ക്കെതിരെ ശക്തമായ പ്ര ക്ഷോഭം തുടങ്ങുമെന്ന് ബിജെ പി അറിയിച്ചു.
