കരുനാഗപ്പള്ളി: ഗര്ഭിണിയായ ഭാര്യയുടെ തൂങ്ങിമരണവുമായി ബന്ധപ്പെട്ട് ഭര്ത്താവിനെയും ഭര്തൃഅമ്മയെയും പോലീസ് അറസ്റ്റ് ചെയ്തു. ഭര്ത്താവിന്റെ സഹോദരി ഒളിവില്. കരുനാഗപ്പള്ളി കല്ലേലിഭാഗം സജിത്ത് ഭവനത്തില് ഗോപകുമാറിന്റെ ഭാര്യ ചിന്നു (27) ആണ് കഴിഞ്ഞ ദിവസം ഭര്തൃഗൃഹത്തില് തൂങ്ങിമരിച്ചത്. കൊല്ലം മുണ്ടക്കല് തെക്കേവിള ചിന്നൂ ഭവനം കുറ്റിയില് തൊടിവീട്ടില് സജീവന്റെ മകള് ചിന്നുവുമായുള്ള വിവാഹം 2014 ജൂണില് ഇലഞ്ഞിക്കല് ക്ഷേത്രത്തില് വച്ചാണ് നടന്നത്. സാമ്പത്തികമായി പിന്നോക്കം നില്ക്കുന്ന ചിന്നുവുമായുള്ള വിവാഹം ഗോപന്റേയും വീട്ടുകാരുടേയും നിര്ബന്ധപ്രകാരമാണ് നടത്തപ്പെട്ടത്. സാമ്പത്തികം പ്രശ്നമല്ലെന്നും വിവാഹം നടത്തി തരണമെന്നുമായിരുന്നു അവരുടെ ആവശ്യം. വിവാഹത്തിന് ചിന്നുവിന് നല്കിയ 20 പവന് സ്വണ്ണം ഗോപനും അമ്മ സരസ്വതിയും സഹോദരിയും കൂടി വിറ്റു. തുടര്ന്ന് വണ്ടിയെടുക്കാനായി ഒരു ലക്ഷം രൂപ കൂടി വാങ്ങിയ ഇവര് വീണ്ടും രണ്ടുലക്ഷം കൂടി ആവശ്യപ്പെട്ടു.
കാലില് കോണ്ക്രീറ്റ് വീണ് പണിക്ക് മാസങ്ങളോളം പോകാതിരുന്ന സജീവന് രണ്ട് ലക്ഷം രൂപ നല്കാന് സാധിച്ചില്ല. ഇതിന്റെ പേരില് ചിന്നുവിനെ മൂവരും ചേര്ന്ന് നിരന്തരം പീഡിപ്പിക്കുകയും ഉപദ്രവിക്കുകയും ചെയ്തിരുന്നു.
രണ്ടുലക്ഷം രൂപ നല്കാത്തതിന്റെ പേരില് ചിന്നുവിനെ പല പ്രാവശ്യം മുണ്ടയ്ക്കലിലുള്ള വീട്ടില് കൊണ്ടുവിടുകയും വീട്ടിലെ ബുദ്ധിമുട്ടുകൊണ്ടും, മധ്യസ്ഥമാരുടെ ഇടപെടല് മൂലം വീണ്ടും ഭര്തൃവീട്ടില് താമസം തുടര്ന്നതുമാണ്. ഇവര്ക്കെതിരെ സ്ത്രീധനപീഡനം, സ്ത്രീപീഡനം, ആത്മഹത്യാ പ്രേരണ എന്നീ കുറ്റങ്ങള് ചുമത്തി കേസെടുത്തതായി എസിപി എസ്.ശിവപ്രസാദ്, സിഐ അനില്കുമാര്, എസ് ഐ രാജേഷ് എന്നിവര് അറിയിച്ചു.
