കണ്ണൂര്: ലോക പ്രമേഹത്തോടനുബന്ധിച്ച് കുടുംബശ്രീ ജില്ലാ മിഷന്, ജില്ലാ പഞ്ചായത്ത്, ശ്രീചിത്തിര തിരുനാള് ഇന്സ്റ്റിറ്റിയൂട്ട് ഓഫ് മെഡിക്കല് സയന്സസ് ആന്റ് ടെക്നോളജി എന്നിവയുടെ നേതൃത്വത്തില് നടന്ന ഡയബറ്റിക് വാക്കും ട്രെയിനേഴ്സ് ട്രെയിനിംഗും പി.കെ ശ്രീമതി എംപി ഉദ്ഘാടനം ചെയ്തു. പ്രമേഹത്തിനെതിരായ ബോധവല്ക്കരണം ശക്തിപ്പെടുത്തുകയെന്ന ലക്ഷ്യത്തോടെ നടപ്പാക്കുന്ന കേരള ഡയബെറ്റിക് പ്രിവന്ഷന് പ്രോഗ്രാമിന്റെ ഭാഗമായാണ് പരിപാടി സംഘടിപ്പിച്ചത്. കലക്ടറേറ്റ് പരിസരത്ത് നിന്നാരംഭിച്ച് പഴയ ബസ് സ്റ്റാന്റ് വഴി ജില്ലാ പഞ്ചായത്ത് പരിസരത്ത് സമാപിച്ച കൂട്ടനടത്തത്തിന് പി.കെ.ശ്രീമതി എംപി ജില്ലാ പഞ്ചായത്ത് പ്രസിഡന്റ് കെ.വി.സുമേഷ് തുടങ്ങിയവര് നേതൃത്വം നല്കി.
അടുത്തകാലം വരെ ചെറിയവിഭാഗം ആളുകളില് മാത്രം കാണപ്പെട്ടിരുന്ന പ്രമേഹം ഇന്ന് കൊച്ചുകുട്ടികളില്പ്പോലും വ്യാപകമായെന്നും ജീവിതശൈലീരോഗങ്ങള് തടയാന് ശക്തമായ ബോധവല്ക്കരണം അനിവാര്യമാണെന്നും എംപി അഭിപ്രായപ്പെട്ടു. രാജ്യത്തിന്റെ പ്രമേഹരോഗ തലസ്ഥാനമായി കേരളം മാറിയ സാഹചര്യത്തില് നിലവിലെ ജീവിതശൈലി ഉടച്ചുവാര്ക്കാന് ഓരോരുത്തരും തയ്യാറാവണം. ടിവിയും മൊബൈലും വീഡിയോ ഗെയിമുമായി വീടിനുള്ളില് ചടഞ്ഞുകൂടുന്നത് ഒഴിവാക്കി കായികാധ്വാനത്തിന് കുട്ടികളെ പ്രോല്സാഹിപ്പിക്കണം. ഭക്ഷണത്തിന്റെ കാര്യത്തില് പുതിയ ക്രമീകരണങ്ങള്ക്ക് ഓരോരുത്തരും തയ്യാറാവണം. പ്രമേഹരോഗം കാഴ്ചശക്തി നഷ്ടപ്പെടുത്തുകയും വൃക്കകള് തകരാറിലാക്കുകയും ഹൃദ്രോഗങ്ങള്ക്ക് കാരണമാവുകയും ചെയ്യുന്നു. ഇതുവരെ കാത്തിരിക്കാതെ ആവശ്യമായ ചികില്സയും പ്രതിരോധ പ്രവര്ത്തനവും വഴി രോഗം നിയന്ത്രിക്കുകയാണ് വേണ്ടത്. ഇക്കാര്യത്തില് വ്യക്തമായ ബോധവല്ക്കരണമില്ലാത്തതാണ് വലിയ ദുരന്തത്തിലേക്ക് നാട് കൂപ്പുകുത്താന് കാരണം. ഇത് തടയാന് ജില്ലാ പഞ്ചായത്ത് ശക്തമായ പ്രവര്ത്തനത്തിന് രൂപം നല്കിയതായും അവര് പറഞ്ഞു.
ജില്ലാ പഞ്ചായത്ത് ഹാളില് നടന്ന പരിപാടിയില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷനായിരുന്നു. ജില്ലാ പഞ്ചായത്ത് ആരോഗ്യ സ്റ്റാന്റിംഗ് കമ്മിറ്റി ചെയര്മാന് കെ.പി.ജയബാലന് മാസ്റ്റര്, നാഷനല് ഹെല്ത്ത് മിഷന് ജില്ലാ പ്രോഗ്രാം മാനേജര് ഡോ. കെ.വി.ലതീഷ്, കേരള ഡയബെറ്റിക് പ്രിവന്ഷന് പ്രോഗ്രാം പ്രൊജക്ട് മാനേജര് ഡോ.ബി സജിത, ജില്ലാ കുടുംബശ്രീ മിഷന് കോ-ഓഡിനേറ്റര് എന്.രാജേഷ് തുടങ്ങിയവര് സംസാരിച്ചു.
കൊല്ലം, എറണാകുളം, കണ്ണൂര് ജില്ലകളിലാണ് പ്രമേഹ പ്രതിരോധ പദ്ധതി നടപ്പാക്കുന്നത്. ഇതിന്റെ ഭാഗമായി ഓരോ ജില്ലയിലെയും 40 വീതം തെരഞ്ഞെടുക്കപ്പെട്ട കുടുംബശ്രീ പ്രവര്ത്തകര്ക്ക് പ്രമേഹരോഗ കാരണങ്ങള്, ലക്ഷണങ്ങള്, പ്രതിരോധ മാര്ഗങ്ങള്, ചികില്സ തുടങ്ങിയകാര്യങ്ങളില് ശിവകുമാര്, ഡോ.മീര സുരേഷ് എന്നിവര് പരിശീലനം നല്കി. പരിശീലനം ലഭിച്ചവര് ജില്ലയിലെ 5000 വീതം ലീഡര്മാര്ക്ക് പരിശീലനം നല്കും. ഇവരാണ് അയല്ക്കൂട്ടങ്ങളില് പ്രമേഹ പ്രതിരോധ പ്രവര്ത്തനങ്ങള്ക്ക് നേതൃത്വം നല്കുക. ശ്രീചിത്തിര തിരുനാള് ഇന്സ്റ്റിറ്റിയൂട്ട് ഓഫ് മെഡിക്കല് സയന്സസ് ആന്റ് ടെക്നോളജിയാണ് പരിശീലനത്തിന് നേതൃത്വം നല്കുന്നത്.
