പയ്യന്നൂര്: കണ്ണൂര് റവന്യു ജില്ലാ ശാസ്ത്രോത്സവത്തിന് ഇന്നലെ പയ്യന്നൂരില് കൊടിയേറി. രാവിലെ 10 മണിക്ക് ബോയ്സ് ഹൈസ്കൂളില് സി.കൃഷ്ണന് എംഎല്എ ഉദ്ഘാടനം ചെയ്തു. നഗരസഭാ ചെയര്മാന് അഡ്വ ശശി വട്ടക്കൊവ്വല് അധ്യക്ഷത വഹിച്ചു. പയ്യന്നൂര് ഗവ.ബോയ്സ് ഹൈസ്കൂള്, ഗവ.ഗേള്സ് ഹയര് സെക്കന്ഡറി സ്കൂള്, കണ്ടങ്കാളി ഷേണായി സ്മാരക ഗവ. ഹയര് സെക്കന്ഡറി സ്കൂള്, ബിഇഎംഎല്പി സ്കൂള്, സെന്റ് മേരീസ് ഗേള്സ് ഹൈസ്കൂള് എന്നിവിടങ്ങളിലായാണ് ശാസ്ത്രോത്സവം നടക്കുന്നത്.
മേളയില് 15 ഉപജില്ലകളില് നിന്നായി 10,000 ഓളം വിദ്യാര്ത്ഥികളും 300 അധ്യാപക മത്സരാര്ത്ഥികളും 2000 ഓളം എസ്കോര്ട്ടിങ് അധ്യാപകരും പങ്കെടുക്കുന്നുണ്ട് . ശാസ്ത്രോത്സവത്തോടനുബന്ധിച്ച് വൊക്കേഷണല് വിദ്യാര്ത്ഥികളെ പങ്കെടുപ്പിച്ച് കണ്ണൂര്, കാസര്കോട് ജില്ലകള് ഉള്പ്പെടുന്ന പയ്യന്നൂര് മേഖലാതല വൊക്കേഷണല് എക്സ്പോയും നടക്കുന്നുണ്ട്. മേഖലയിലെ 41 വൊക്കേഷണല് ഹയര് സെക്കന്ഡറി സ്കൂളുകളില് നിന്നായി 200 ലധികം വിദ്യാര്ത്ഥികള് എക്സ്പോയില് പങ്കെടുക്കുന്നുണ്ട്. പഠനത്തിന്റെ ഭാഗമായി നിര്മ്മിച്ച ഉല്പ്പന്നങ്ങളുടെയും സേവനങ്ങളുടെയും പ്രദര്ശനവും വില്പനയും എക്സ്പോയില് നടക്കുന്നുണ്ട്. സ്റ്റേഡിയത്തില് ഒരുക്കിയ 50 സ്റ്റാളുകളിലായാണ് എക്സപോ നടക്കുന്നത്.
ശാസ്ത്രമേള ഗവ.ബോയ്സ് ഹൈസ്കൂള്, ബിഇഎംഎല്പി സ്കൂള് എന്നിവിടങ്ങളിലും ഗണിത ശാസ്ത്രമേള, സാമൂഹിക ശാസ്ത്രമേള, പ്രവര്ത്തി പരിചയമേള, ഐടി മേള എന്നിവ യഥാക്രമം ഗവ. ഗേള്സ് ഹൈസ്കൂള്, കണ്ടങ്കാളി ഷേണായി സ്മാരക ഹയര് സെക്കന്ഡറി സ്കൂള്, സെന്റ് മേരീസ് ഗേള്സ് ഹൈസ്കൂള് എന്നിവിടങ്ങളിലുമാണ് നടക്കുന്നത്. ഐടി മേള ഗവ. ബോയ്സ് ഹൈസ്കൂളിലും ഗവ. ഗേള്സ് ഹയര് സെക്കന്ഡറി സ്കൂളിലുമാണ് നടക്കുന്നത് .
ഇന്ന് വൈകുന്നേരം നടക്കുന്ന സമാപന സമ്മേളനം നഗരസഭാ വൈസ് ചെയര്മാന് കെ.പി.ജ്യോതിയുടെ അധ്യക്ഷതയില് ടി.വി.രാജേഷ് എംഎല്എ ഉദ്ഘാടനം ചെയ്യും. സംഘാടക സമിതി ജനറല് കണ്വീനും വിദ്യാഭ്യാസ ഡപ്യൂട്ടി ഡയറക്ടരുമായ എം.ബാബുരാജന്, സഞ്ജീവന്, വി.നന്ദകുമാര്, ടി.എസ്.രാമചന്ദ്രന് മാസ്റ്റര് തുടങ്ങിയവര് സംസാരിക്കും.
