കണ്ണൂര്: 1960 ലെ കേരള ഷോപ്പ്സ് ആന്റ് കൊമേഴ്സ്യല് എസ്റ്റാബ്ലിഷ്മെന്റ് നിയമ പ്രകാരം തൊഴില് വകുപ്പില് രജിസ്റ്റര് ചെയ്തിട്ടുള്ള സ്ഥാപനങ്ങളും വ്യക്തികളും 2017 ലേക്കുള്ള രജിസ്ട്രേഷന് നവംബര് 30 നകം ഓണ്ലൈനായി അപേക്ഷ നല്കി പുതുക്കണമെന്ന് ജില്ലാ ലേബര് ഓഫീസര് (എന്ഫോഴ്സ്മെന്റ്) അറിയിച്ചു. നിലവിലുള്ള സര്ട്ടിഫിക്കറ്റ് ഓണ്ലൈനായി മാറിയതിന്റെ 14 അക്ക നമ്പര് അതാത് അസിസ്റ്റന്റ് ലേബര് ഓഫീസറില് നിന്ന് വാങ്ങി ംംം.ഹര.സലൃമഹമ.ഴീ്.ശി വഴി ഓണ്ലൈനായിട്ടാണ് അപേക്ഷിക്കേണ്ടത്. ഓണ്ലൈന് അപേക്ഷ നല്കിയാല് ലഭിക്കുന്ന അഞ്ചക്ക നമ്പറും നിലവിലുള്ള സര്ട്ടിഫിക്കറ്റും സഹിതം നവംബര് മാസത്തിലെ തിങ്കള്, ബുധന്, വെള്ളി ദിവസങ്ങളില് അസിസ്റ്റന്റ് ലേബര് ഓഫീസുകളില് നേരിട്ട് ഹാജരായി ഫീസ് അടക്കാം. മറ്റ് പ്രവൃത്തി ദിവസങ്ങളില് ട്രഷറി ചലാന് സഹിതമാണ് അപേക്ഷിക്കേണ്ടത്.
തൊഴിലാളികള് ഉണ്ടെങ്കിലും ഇല്ലെങ്കിലും എല്ലാ കടകളും വാണിജ്യ സ്ഥാപനങ്ങളും ആരംഭിച്ച് 60 ദിവസത്തിനകം തൊഴില് വകുപ്പിന്റെ രജിസ്ട്രേഷന് എടുക്കണമെന്നാണ് നിയമം. പുതുതായി ആരംഭിച്ച സ്ഥാപനങ്ങള്, ഷോപ്പ് ക്ഷേമനിധിയില് അംഗമായിട്ടുള്ള ഇതുവരെയും രജിസ്ട്രേഷന് എടുക്കാത്ത സ്ഥാപനങ്ങള്, ഫാക്ടറികളുടെയും സ്ഥാപനങ്ങളുടെയും സ്റ്റോര്റൂം, ഗോഡൗണ്, വെയര് ഹൗസുകള് 14 ദിവസത്തിലധികം പ്രവര്ത്തിക്കുന്ന മേളകള് എന്നിവയ്ക്ക് പ്രത്യേകം രജിസ്ട്രേഷന് എടുക്കണം. നവംബര് 30 കഴിഞ്ഞ് സമര്പ്പിക്കുന്ന അപേക്ഷകള്ക്ക് 25 ശതമാനം അധിക ഫീസ് നല്കണം രജിസ്റ്റര് ചെയ്യാത്തതും പുതുക്കാത്തതുമായ സ്ഥാപന ഉടമകള്ക്ക് എതിരെ നിയമ നടപടികള് സ്വീകരിക്കുന്നതും 5000 രൂപ വരെ പിഴ ഈടാക്കുന്നതുമാണെന്നും ജില്ലാ ലേബര് ഓഫീസര് അറിയിച്ചു. കൂടുതല് വിവരങ്ങള്ക്ക് കണ്ണൂര് 1, 2, 3 സര്ക്കിള്, തലശ്ശേരി, കൂത്തുപറമ്പ്, ഇരിട്ടി, തളിപ്പറമ്പ്, പയ്യന്നൂര് അസിസ്റ്റന്റ് ലേബര് ഓഫീസുകളുമായി ബന്ധപ്പെടണം. ഫോണ് -0497 2700353.
