വീട്ടില്‍ വളര്‍ത്തിയിരുന്ന വന്യമൃഗങ്ങളെ പിടികൂടി

തൊടുപുഴ: കഥളിക്കാട് വീട്ടില്‍ വളര്‍ത്തിയിരുന്ന വന്യമൃഗങ്ങളെ വനംവകുപ്പ് പിടികൂടി. രണ്ട് ഉടുമ്പ്, ഒന്ന് വീതം പെരുമ്പാമ്പ്, ആമ എന്നിവയെയാണ് അനധികൃതമായി വീട്ടില്‍ വളര്‍ത്തിയ നിലയില്‍ കണ്ടെത്തിയത്.

സംഭവത്തില്‍ വീട്ടുടമ കദളിക്കാട് മയിലാടൂര്‍ ഡോ. കുര്യന്‍ (71) നെ തൊടുപുഴ വനംവകുപ്പ് ഉദ്യോഗസ്ഥര്‍ പിടികൂടി. ഇന്നലെ ഉച്ചയോടെ നടത്തിയ പരിശോധനയിലാണ് മൃഗങ്ങളെ കണ്ടെത്തിയത്. തൊടുപുഴ റേഞ്ച് ഓഫീസര്‍ കെ എന്‍ ബാബുവിന്റെ നേതൃത്വത്തിലുള്ള സംഘമാണ് കേസ് പിടിച്ചത്.

12 ഏക്കറോളം വരുന്ന സ്ഥലത്ത് വിവിധ ഫാമുകളും ആറിലധികം കുളങ്ങളുമുണ്ട്. വലിയ വീടിന്റെ പിന്നിലായി പ്രത്യേകം നിര്‍മ്മിച്ച കൂടുകളിലാണ് മൃഗങ്ങളെ വളര്‍ത്തിയിരുന്നത്. എല്ലാ വശങ്ങളില്‍ നിന്നും ഗ്രില്ല് ഉപയോഗിച്ച് പൂട്ടും നിര്‍മ്മിച്ചിരുന്നു. വലിയ വീട് അത്യാധുനിക രീതിയില്‍ നിര്‍മ്മിച്ചതാണ്. നിരവധി സുരക്ഷാ സംവിധാനങ്ങളും ഒരുക്കിയിട്ടുണ്ട്. ആദ്യപരിശോധനയില്‍ മൃഗങ്ങളെ കണ്ടെത്താനായില്ലെങ്കിലും വിശദമായ അന്വേഷണത്തിലാണ് കട്ടയുടെ ഇടയില്‍ നിന്നും ഉടുമ്പിനെ കണ്ടെത്തുന്നത്. കുതിര, ആട്, പശു, വിവിധതരം കോഴി എന്നിവയെയും വിവിധ ഇടങ്ങളിലായി വളര്‍ത്തുന്ന ഇവിടെ 4 ജോലിക്കാരുമുണ്ട്. പുറത്ത് നിന്ന് ആരും കടക്കാതിരിക്കാന്‍ 5ലധികം നായ്‌ക്കളെയും ഇവിടെ വളര്‍ത്തുന്നുണ്ട്.

വീട്ടുടമയുമായി തെറ്റിപ്പിരിഞ്ഞ ഇവിടുത്തെ തന്നെ ജോലിക്കാരന്‍ നല്‍കിയ രഹസ്യവിവരത്തിന്റെ അടിസ്ഥാനത്തിലാണ് വന്യമൃഗങ്ങളെ പിടികൂടിയത്.

കാളിയാര്‍ മണിയംപ്രായില്‍ തോമസ് സെബാസ്റ്റിനാണ് പരാതിക്കാരന്‍. തന്റെ പശു, കോഴി, ആട് എന്നിവയും വണ്ടിയും കുര്യന്‍ വീട്ടില്‍ പിടിച്ച് വച്ചിരിക്കുന്നതായി കക

ാട്ടി ഇയാള്‍ വാഴക്കുളം പോലീസില്‍ പരാതി നല്‍കിയിരുന്നു. പ്രതിക്കെതിരെ വേട്ടയാടല്‍, അന്യായമായി സര്‍ക്കാര്‍ ഉടമസ്ഥതയിലുള്ള മൃഗങ്ങളെ തടങ്കലില്‍ വയ്‌ക്കല്‍ തുടങ്ങിയ വകുപ്പുകള്‍ പ്രകാരമാണ് കേസെടുത്തിരിക്കുന്നത്. 4 മണിക്കൂറിലധികം നേരം ചോദ്യചെയ്ത ശേഷമാണ് പ്രതിയെ വീടിന് പുറത്തെത്തിക്കുന്നത്.

തൊടുപുഴ എക്‌സൈസിലെ ഡെപ്യൂട്ടി റേഞ്ചര്‍മാരായ വിഎസ് അബ്ദുള്‍ നാസര്‍, ജയചന്ദ്രബോസ് ഉദ്യോഗസ്ഥരായ ബിജു എസ് മണ്ണൂര്‍, ഇര്‍ഷാദ്, ടോമിന്‍ ജെ., അനീഷ്, മുജീബ്, ഷിബു, ജോസഫ് എന്നിവരും അന്വേഷണ സംഘത്തിലുണ്ടായിരുന്നു.

കൂടുതല്‍ ചോദ്യംചെയ്യലിന് ശേഷം ഇന്ന് പ്രതിയെ കോടതിയില്‍ ഹാജരാക്കും. കേസിനെക്കുറിച്ച് പഠിച്ച ശേഷം ഒരാഴ്ചക്കകം വിശദമായ റിപ്പോര്‍ട്ട് കോടതിയ്‌ക്ക് കൈമാറുമെന്നും റേഞ്ച് ഓഫീസര്‍ പറഞ്ഞു.

അതേ സമയം തനിക്കെതിരെ പരാധി നല്‍കിയ ആള്‍ തന്നെ കുടുക്കുവാനായി ഇവിടെ മൃഗങ്ങളെ കൊണ്ടുവന്നിട്ടതാണെന്ന വിശദീകരണമാണ് വീട്ടുടമ നല്‍കുന്നത്. എന്നാല്‍ ഇത് വനംവകുപ്പ് മുഖവുരക്കെടുത്തിട്ടില്ല. പിടികൂടിയ മൃഗങ്ങളെയും കോടതിയില്‍ ഹാജരാക്കും. ഇതിനിടയില്‍ ഇന്നലെ രാത്രി 7.30യോടെ ക്ഷീണം അനുഭവപ്പെട്ട പ്രതി കാരിക്കോട് താലൂക്ക് ആശുപത്രിയില്‍ ചികിത്സ തേടി.