സിഡ്നി: ഓസ്ട്രേലിയയിലെ ഈ വീട്ടമ്മയുടെ സാഹസികത നിറഞ്ഞ രംഗം കണ്ടാൽ ആരാണ് ഞെട്ടിത്തരിക്കാത്തത്. ആറടി നീളവും അതിനൊത്ത വള്ളവുമുള്ള കൂറ്റൻ മുതലയെ കൈകൊട്ടി ആട്ടിപ്പായിക്കുന്ന ഈ പെൺപുലി സ്ത്രീയുടെ മനോധൈര്യത്തിന്റെയും കരുത്തിന്റെയും പര്യായമാണ്.
ഓസ്ട്രേലിയയിലെ കക്കാഡു വന സംരക്ഷണ കേന്ദ്രത്തിലെ മുതലകൾ കൂടുതൽ വസിക്കുന്ന ‘ഈസ്റ്റ് അലിഗേറ്റർ’ നദിയുടെ കരയിലാണ് രസകരവും അതിനൊപ്പം ആശ്ചര്യം നിറഞ്ഞതുമായ രംഗങ്ങൾ അരങ്ങേറിയത്. നദിക്കരയിൽ തന്റെ നായക്കുട്ടിയുമായി എത്തിയതായിരുന്നു യുവതി. കുത്തിമറിയുന്ന നദിയിൽ നിരവധി മുതലകൾ ഒഴുകി നടക്കുന്നുണ്ട്.
കരയിൽ നിൽക്കുന്ന യുവതിയെയും നായക്കുട്ടിയേയും പിടികൂടി ശാപ്പിടാം എന്ന് കരുതി മുതല യുവതിക്ക് അടുത്ത് എത്തി. എന്നാൽ മുതല അല്ല ദിനോസർ വന്നാൽ പോലും നമുക്ക് പുല്ലാണെന്ന പ്രതീതി ആയിരുന്നു യുവതിക്ക് ഉണ്ടായിരുന്നത്. ശബ്ദമുണ്ടാക്കി ആളെ കൂട്ടാനോ ആയുധോപകരണങ്ങൾ തപ്പിയെടുക്കാനോ യുവതി ശ്രമിച്ചില്ല.
തന്റെ കാലിൽ കിടന്നിരുന്ന ചെരുപ്പ് ഊരി കൈകളിൽ പിടിച്ച് മുതലയ്ക്ക് സമീപത്ത് എത്തിയ യുവതി ഉച്ചത്തിൽ എന്തോ പറയുകയും ചെരുപ്പ് എടുത്ത് കൈകളിൽ അടിച്ച് ശബ്ദമുണ്ടാക്കി മുതലയെ ആട്ടിയോടിക്കുകയായിരുന്നു.
ഈ രംഗങ്ങൾ എല്ലാം തന്നെ നദിക്കരയിൽ നിന്നിരുന്ന മുതല പിടുത്തക്കാരൻ ലുണ്ടൻ അനെലെ സാർക്ക് തന്റെ ക്യാമറയിൽ പകർത്തുകയും ചെയ്തു. ‘ഈസ്റ്റ് അലിഗേറ്റർ’ നദിയിൽ ഏകദേശം 120ഓളം മുതലകൾ വസിക്കുന്നുണ്ടെന്നാണ് കണക്കുകൾ സൂചിപ്പിക്കുന്നത്.
https://www.youtube.com/watch?v=wq3UMdWD1Es
