ശ്രീനഗര്: ഉറി ഭീകരാക്രമണ രീതിയിലുള്ള ആക്രമണം നടത്താനാണ് ബാരമുള്ളയില് ഭീകരര് ലക്ഷ്യമിട്ടതെന്ന് ബിഎസ്എഫ്. എന്നാല് ഭീകരരുടെ ഈ ശ്രമത്തെ സൈനികര് തകര്ത്തതായി ബിഎസ്എഫ് അഡിഷണല് ഡയറക്ടര് ജനറല് അരുണ് കുമാര് പറഞ്ഞു.
ക്യാമ്പിലെ ബങ്കറിനു മുന്നില് ഒരു വേലി മുറിച്ച് ഉറിയിലേതിനു സമാനമായ രീതിയില് സൈനിക ക്യാമ്പില് ആക്രമണം നടത്താനായിരുന്നു ഭീകരരുടെ പദ്ധതി. എന്നാല്, ബിഎസ്എഫ് ജവാന്മാരുടെ ശക്തമായ ഇടപെടലിലൂടെ ഭീകരരെ തുരത്തുകയായിരുന്നു. വേലിക്കരുകില് നിന്നും വയര് കട്ടര്, ജിപിഎസ്, വടക്കുനോക്കിയന്ത്രം തുടങ്ങിയവ കണ്ടെടുത്തിട്ടുണ്ട്.
ഏറ്റുമുട്ടലിനിടെ ഒരു ജവാന് ജീവന് നഷ്ടമായി. മറ്റൊരാള്ക്ക് പരുക്കേറ്റു. ഭീകരര് യുബിജിഎല് ഗ്രനേഡ് ഉപയോഗിച്ച് ബങ്കര് ആക്രമിച്ചു. രണ്ടു ഭീകരര് ആണ് ഉണ്ടായിരുന്നതെന്നും ഇവര് ഇരുട്ടിന്റെ മറവില് രക്ഷപ്പെട്ടെന്നും ജവാന്മാര് പറഞ്ഞതായി ബിഎസ്എഫ് അഡീഷണല് ഡയറക്ടര് ജനറല് അരുണ് കുമാര് വ്യക്തമാക്കി.
ബാരാമുള്ളയില് കൊല്ലപ്പെട്ട ബിഎസ്എഫ് ജവാന് ആദരവ് അര്പ്പിച്ച ശേഷം മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. സുരക്ഷാ ക്രമീകരണങ്ങള് തകര്ത്ത് കടക്കാന് ശ്രമിച്ച ഭീകരരെ തടഞ്ഞ് മികച്ച പ്രവര്ത്തനമാണ് സേന കാഴ്ചവച്ചതെന്നും അദ്ദേഹം വ്യക്തമാക്കി. ആദ്യം തീവ്രവാദികള് വെടിവെയ്പ്പ് നടത്തി. പിന്നീട് ബങ്കറുകളില് ഗ്രനേഡ് ആക്രമണം നടത്തി. തീവ്രവാദികളുടെ സാന്നിദ്ധ്യം പ്രദേശത്ത് ഉള്ളതായി സംശയിക്കുന്നതിനാല് സേന ജാഗ്രതയിലാണെന്നും അദ്ദേഹം പറഞ്ഞു.
