മറയൂര്: കാന്തല്ലൂരില് ബിജെപി പ്രവര്ത്തകനെ ആക്രമിച്ച് ഗുരുതരമായി പരിക്കേല്പ്പിച്ച കേസില് ഒരാള് പിടിയില്. മിഷ്യന്വയല് സ്വദേശി ജ്ഞാനപ്പഴം(42) ആണ് പിടിയിലായത്.
അക്രമത്തിന് നേതൃത്വം നല്കിയ കാന്തല്ലൂര് പഞ്ചായത്തിലെ 9-ാം വാര്ഡ് മെമ്പര് സെല്വകുമാര് അടക്കം മൂന്ന് പേര് ഒളിവിലാണ്. സംഭവത്തില് പരിക്കേറ്റ മിഷ്യന്വയല് സ്വദേശിയും ബിജെപി പ്രവര്ത്തകനുമായ എസ് രാജേന്ദ്രന്(26) ഇന്നലെ ആശുപത്രി വിട്ടു. സിപിഎമ്മില് ചേര്ന്ന് പ്രവര്ത്തിക്കണമെന്ന് ആവശ്യപ്പെട്ട് കഴിഞ്ഞ 23നാണ് നാലംഗ സംഘം രാത്രി 8ന് വീട്ടില് കയറി രാജേന്ദ്രനെ ആക്രമിച്ചത്. തലയ്ക്കും കൈയ്ക്കുമാണ് പരിക്കേറ്റത്. സംഭവത്തില് പോലീസ് നടപടി വൈകുന്നു എന്നാരോപിച്ച് ബിജെപി നേതാക്കള് രംഗത്തെത്തിയിരുന്നു.
ജില്ലാ പോലീസ് മേധാവിക്ക് നല്കിയ പരാതിയുടെ അടിസ്ഥാനത്തിലാണ് ഇന്നലെ മറയൂര് എസ്ഐ കെ എ ഷാജിയുടെ നേതൃത്വത്തിലുള്ള സംഘം പ്രതിയെ പിടികൂടിയത്. 308 വകുപ്പ് പ്രകാരമാണ് കേസ് എടുത്തിരിക്കുന്നത്. സംഭവത്തില് മറ്റ് പ്രതികളെ അന്വേഷിച്ച് വരികയാണെന്നും വാര്ഡ്മെമ്പര് അടക്കമുള്ളവര് ഒളിവിലാണെന്നുമാണ് പോലീസ് നല്കുന്ന വിശദീകരണം.
