എരുമേലി: എസ്എന്ഡിപിയേയും, യൂണിയന്, ശാഖയോഗങ്ങള്ക്കെതിരേയും നവമാധ്യമങ്ങള് വഴി നിരന്തരം കുപ്രചരണം നടത്തുന്ന ശാഖയിലെ അംഗങ്ങളായ രണ്ടു പേര്ക്കെതിരെ ശിക്ഷണ നടപടി സ്വീകരിക്കണമെന്നാവശ്യപ്പെട്ട് വിശേഷാല് പൊതുയോഗം യൂണിയന് റിപ്പോര്ട്ട് നല്കി.
വെണ്കുറിഞ്ഞി സ്വദേശികളായ പറയരുപറമ്പില് വീട്ടില് റ്റി. എസ്. ജയകുമാര്, പടിഞ്ഞാറേതില് വീട്ടില് പി. എസ്. ബ്രഷ്ണേവ് എന്നിവര്ക്കെതിരെയാണ് വെണ്കുറിഞ്ഞി 286-ാം നമ്പര് ശാഖാ യോഗം എരുമേലി യൂണിയന് കത്ത് നല്കിയിരിക്കുന്നതെന്നും ശാഖാ സെക്രട്ടറി പി.ജെ. ലിജി പറഞ്ഞു.
ഒരു മാസം മുന്പ് ശാഖയില്പ്പെട്ട ഒരു കുടുംബത്തിലെ വിവാഹവുമായി ബന്ധപ്പെട്ട പ്രശ്നങ്ങളാണ് നടപടിക്ക് വഴിയൊരുക്കിയതെന്നും ലിജി പറഞ്ഞു. കുടുംബ യോഗങ്ങളുടെ പ്രാര്ത്ഥന ചടങ്ങുകള്ക്കിടെ ചില അംഗങ്ങള് നടത്തിയ രാഷ്ട്രീയ അഭിപ്രായങ്ങളുടെ പേരില് നരിയാനിപൊയ്കയില് ശശിയും കുടുംബവുമായി, കുടുംബ യൂണീറ്റുകളും, പിന്നീട് ശാഖയും തര്ക്കത്തിലേര്പ്പെടുകയായിരുന്നു.
എന്നാല് ശശിയേയും കുടുംബത്തേയും ഊരുവിലക്കി, കല്ല്യാണപത്രിക നല്കിയില്ല, കല്ല്യാണത്തിന് പോകുന്ന മറ്റ് അംഗങ്ങളില് നിന്നും ആയിരം രൂപ ഈടാക്കും, എന്നു തുടങ്ങി നിരവധിയായ കുപ്രചരണങ്ങളാണ് നവമാധ്യമങ്ങള് വഴി രണ്ടു പേരും നടത്തിയതെന്നും ലിജി പറഞ്ഞു.
വെണ്കുറിഞ്ഞി ശാഖയില് ഇത്തരത്തിലുള്ള നടപടികളൊന്നും നടന്നിട്ടില്ലെന്ന് ചൂണ്ടിക്കാട്ടി എരുമേലി യൂണിയനും വിശദീകരണവുമായി രംഗത്തെത്തിയിരുന്നു. ഇതില് പി. എസ്. ബ്രഷ്ണേവിനെ മുമ്പും ഇതേ പ്രശ്നങ്ങളുടെ പേരില് പുറത്താക്കിയിട്ടുണ്ടന്നും അദ്ദേഹം പറഞ്ഞു. വെണ്കുറിഞ്ഞി മേഖലയില് തുടര്ച്ചയായി ശാഖാ അംഗങ്ങളിലും, പൊതുജന മധ്യത്തിലും തെറ്റിദ്ധാരണ ഉണ്ടാക്കാനും, ശാഖാ പ്രവര്ത്തനങ്ങളെ തകര്ക്കാനുള്ള സംഘടനാ വിരുദ്ധ പ്രവര്ത്തനങ്ങള് നടത്തുന്ന രണ്ടു പേര്ക്കെതിരെ മാതൃകാപരമായ നടപടി എടുക്കണമെന്നും റിപ്പോര്ട്ടില് പറയുന്നു.
എരുമേലി യൂണിയനു നല്കിയ റിപ്പോര്ട്ട് ചര്ച്ചകള്ക്ക് ശേഷം, യോഗം കൗണ്സില് നല്കുകയും തുടര്ന്ന് നടപടി ഉണ്ടാകുമെന്നാണ് പ്രതീക്ഷിക്കുന്നതെന്നും ലിജി ‘ജന്മഭൂമി’ യോട് പറഞ്ഞു.
എന്നാല് ശാഖയുടേയും യൂണിയന്റെയും തെറ്റായ നീക്കങ്ങളെ തെളിവുകളുടെ അടിസ്ഥാനത്തില് നിയമപരമായി നേരിടുമെന്നും റ്റി. എസ്. ജയകുമാര് പറഞ്ഞു.
