കൊച്ചി: രാജ്യാന്തര വിമാനത്താവളകമ്പനി (സിയാല്‍)യിലെ ഓഹരി ഉടമകള്‍ക്ക് 25 % ലാഭവിഹിതം നല്‍കാനുള്ള ഡയറക്ടര്‍ ബോര്‍ഡ് ശുപാര്‍ശ വാര്‍ഷിക പൊതുയോഗം അംഗീകരിച്ചു. ചെയര്‍മാന്‍ കൂടിയായ മുഖ്യമന്ത്രി പിണറായി വിജയന്‍ ബോര്‍ഡ് ശുപാര്‍ശ പൊതുയോഗത്തില്‍ അവതരിപ്പിച്ചു. ഓഹരി ഉടമകള്‍ക്ക് ഇതുവരെ ലഭിച്ചത് 178 % ലാഭവിഹിതമാണ്.
സിയാലിന്റെ കഴിഞ്ഞ വര്‍ഷത്തെ മൊത്തവരുമാനം 524.53 കോടി രൂപയും അറ്റാദായം 175.22 കോടി രൂപയുമാണ്. കഴിഞ്ഞ വര്‍ഷം 7.77 ദശലക്ഷം യാത്രക്കാര്‍ വിമാനത്താവളം ഉപയോഗിച്ചു. മുന്‍വര്‍ഷത്തേക്കാള്‍ 21.20 %. വിമാനത്താവളത്തില്‍ 13.4 മെഗാവാട്ട് ശേഷിയുള്ള പുതിയ സൗരോര്‍ജ പ്ലാന്റ് ഫെബ്രുവരിയില്‍ പ്രവര്‍ത്തനസജ്ജമാകും. 15.4 മെഗാവാട്ട് ശേഷിയുള്ള നിലവിലുള്ള പ്ലാന്റുകളില്‍ നിന്നും ആഗസ്റ്റ് 31 വരെ 2.53 കോടി യൂണിറ്റ് വൈദ്യുതി ഉല്‍പ്പാദിപ്പിച്ചു. പ്രതിദിനം 1,15,000 യൂണിറ്റ് വൈദ്യുതി ഉല്‍പ്പാദിപ്പിക്കുന്നതോടെ നിലവിലുള്ള ഊര്‍ജോല്‍പ്പാദനം ഈ സാമ്പത്തികവര്‍ഷത്തില്‍ തന്നെ 28.8 മെഗാവാട്ടാകുമെന്ന് മുഖ്യമന്ത്രി പറഞ്ഞു
മന്ത്രിയും ഡയറക്ടറുമായ വി.എസ്. സുനില്‍കുമാര്‍, മാനേജിങ് ഡയറക്ടര്‍ വി.ജെ. കുര്യന്‍, ഡയറക്ടര്‍മാരായ കെ. റോയ് പോള്‍, എം.എ. യൂസഫലി, എ.കെ. രമണി, എന്‍.വി. ജോര്‍ജ്, സി.വി. ജേക്കബ്, ഇ.എം. ബാബു തുടങ്ങിയവരും വേദിയിലുണ്ടായിരുന്നു.
പ്രതികരിക്കാൻ ഇവിടെ എഴുതുക: