ആകാശത്ത് നിന്ന് യുവതിക്ക് കിട്ടിയ ക്യാറ്റ് ഫിഷ്!

ന്യൂയോർക്ക്: ഫിലാഡൽഫിയ സ്വദേശിനിയായ ലിസാ ലോബ്രി ആർട്ട് ഗ്യാലറിക്കു സമീപമുള്ള തന്റെ ലേബർ ഡേ എക്സർസൈസ് ക്ലാസിനായി പോകുകയായിരുന്നു. ക്ലാസ് തുടങ്ങുന്നതിന് മുൻപ് ഹാളിൽ പ്രവേശിക്കാനുള്ള തിടുക്കത്തിലാണ് ലിസയുടെ നടത്തം. പെട്ടന്നാണ് അത് സംഭവിച്ചത്. ആകാശത്തു നിന്നും എന്തോ ഒരു സാധനം ലിസയുടെ മുഖത്തേക്ക് പതിച്ചു. ഞെട്ടിത്തരിച്ചു പോയ ലിസ തന്റെ മുഖത്ത് തട്ടി നിലത്ത് കിടക്കുന്ന വസ്തുവിലേക്ക് സൂക്ഷമമായി നോക്കി.

പക്ഷിയാണോ? അതോ ചെറിയ കുട്ടികളുടെ വിമാനമോ? അല്ലേ അല്ല, ഇത് ഒരു മീനാണ് രണ്ടര കിലോ ഭാരം വരുന്ന ക്യാറ്റ് ഫിഷ്, ഇതിനിടയിൽ തന്റെ ഇടതു കണ്ണിനു താഴെ നിന്നും ചോരതുള്ളികൾ ഇറ്റിറ്റു വീഴാനും തുടങ്ങി. മീൻ വീണതിനെ തുടർന്ന് ഇടത് കണ്ണിന്റെ ഭാഗത്ത് മുറിവേറ്റിരിക്കുന്നു.

അപ്പോഴേക്കും സമീപത്തുള്ളവർ ലിസയുടെ ചുറ്റും കൂടി. പിന്നെ എല്ലാവരും കൂടിയാലോചിച്ചു, എങ്ങനെ ഇത് സംഭവിച്ചു, ഒരു പക്ഷേ ആകാശത്ത് നിന്നും പറന്നു വീണതാകാം, ചിലർ പറഞ്ഞു, വിശ്വാസയോഗ്യമല്ല ആ വാക്കുകൾ, ചിലപ്പോൾ പക്ഷികളുടെ കൈകളിൽ നിന്നും വീണതായിരിക്കുമെന്ന് ആരോ പറഞ്ഞു. അതെ, ലിസയും അത് സമ്മതിച്ചു.

എന്തായാലും തന്റെ ദേഹത്ത് തന്നെ ഈ ചീഞ്ഞ മീൻ വീണല്ലോ എന്ന ജാള്യത ലിസയുടെ മുഖത്ത് നിഴലിച്ചിരുന്നു. ആകാശത്ത് നിന്നും  ആദ്യമായിട്ട് മീൻ  ദേഹത്ത് വീണ വ്യക്തി താനായിരിക്കുമെന്ന് ലിസ തമാശ രൂപേണ പറഞ്ഞു.

https://www.youtube.com/watch?v=kNa3etdROFM