പത്തനംതിട്ട: പരുമല തിക്കപ്പുഴ മേഖലയില് സിപിഎം ഗുണ്ടാവിളയാട്ടം. ഏതാനുംദിവസമായി തുടരുന്ന മാര്ക്സിസ്റ്റ് തേര്വാഴ്ചയില് പ്രതിഷേധിച്ച് സംഘപരിവാര് സംഘടനകള് നടത്തിയ പ്രതിഷേധമാര്ച്ചിന് നേരേയും അക്രമണമുണ്ടായി. കര്ഷകമോര്ച്ച മണ്ഡലം സമിതിയംഗം രാജേഷ്കുമാര് ഉള്പ്പെടെ നിരവധി പ്രവര്ത്തകര്ക്കും തിരുവല്ല സിഐ വിദ്യാധരനും മാര്ക്സിസ്റ്റ് അക്രമത്തില് പരിക്കേറ്റു.
ബിജെപി തിരുവല്ല നിയോജകമണ്ഡലം ട്രഷറാര് ഉണ്ണികൃഷ്ണന്നായരുടെ വീട് അക്രമിച്ചതില് പ്രതിഷേധിച്ച് ഇന്നലെ പരുമലയില് നടന്ന മാര്ച്ചിന് ബിജെപി ജില്ലാ വൈസ് പ്രസിഡന്റ് വിജയകുമാര് മണിപ്പുഴ, യുവമോര്ച്ച ജില്ലാ പ്രസിഡന്റ് സിബി സാം തോട്ടത്തില്, ആര്എസ്എസ് മണ്ഡല് കാര്യവാഹ് സുമേഷ്, വൈശാഖ് എന്നിവര് നേതൃത്വം നല്കി. പ്രതിഷേധമാര്ച്ചിന് നേരെ മാരകായുധങ്ങളുമായി സിപിഎം ഗുണ്ടാസംഘം അക്രമം അഴിച്ചുവിടുകയായിരുന്നു. പരിക്കേറ്റ കര്ഷകമോര്ച്ച മണ്ഡലം സമിതിയംഗം രാജേഷ്കുമാറും മറ്റ് പ്രവര്ത്തകരും ആശുപത്രിയില് ചികിത്സതേടി. പോലീസിന് നേരെയും അക്രമം അഴിച്ചുവിട്ട സിപിഎം ക്രിമിനല്സംഘം രാത്രി വൈകിയും സംഘപരിവാര് പ്രവര്ത്തകരുടെ വീടുകള്ക്ക് നേരെ അക്രമം തുടര്ന്നു.
