തുമ്പയും തമ്പുരാനും

ആവണിനിലാവുമെഴുകിയ,മുറ്റ-

ത്താരു മെനയുന്നു അത്തക്കളം

ആടിമേഘത്തുടിയോടിമറയവേ,

യാ,തിരവിളക്കു തെളിച്ചപോലെ.

മഴവില്ലിന്നേഴു വര്‍ണങ്ങള്‍ ചാലിച്ചു

നിറപ്പകിട്ടാര്‍ന്നൊരു പുഷ്പക്കളം

അത്തം കറുത്താലു,മോണം വെ-

ളു,ക്കുമെന്നാരോ മൊഴിയും സ്നേഹക്കളം.

പിച്ചകപ്പൂമണമൊഴുകുന്നു,തെച്ചിയും-

തുമ്പയും ചിരിതൂകുമീക്കളത്തില്‍,

പേരറിയാ നാട്ടുപൂക്കളും മിഴിതുറ-

ന്ന,രചനെ വേല്‍ക്കാനൊരുങ്ങി നില്‍പ്പൂ.

സ്വര്‍ണമണിരഥമേറി മഹാബലി-

നടവഴിയിടവഴി പിന്നിടുമ്പോള്‍,

നാലുവെളുപ്പിനുണര്‍ന്നു കൈകൂപ്പുന്നു

നാട്ടിലുടനീളം പൂക്കളങ്ങള്‍.

ആയിരം പുക്കളുണ്ടെങ്കിലും തമ്പുരാന്‍

വാരിളം തുമ്പപ്പൂവൊന്നെടുത്തു,

മകുടത്തില്‍ തിരുകി മടങ്ങിയാ മന്നന്‍

മനസിന്റെയോണസ്മൃതി പഥത്തില്‍.