ബി. പ്രമോദ്കുമാര്
പുനലൂര്: എസ്എന് കോളേജില് ഇന്ന് നടക്കുന്ന കനകജൂബിലി സമ്മേളനത്തില് പിണറായി പങ്കെടുക്കുന്നതില് സിപിഎം പ്രാദേശിക നേതൃത്വത്തിന് എതിര്പ്പ്. വെള്ളാപ്പള്ളിയോടൊപ്പം വേദി പങ്കിടുന്നതാണ് എതിര്പ്പിന് കാരണം.
എതിര്പ്പ് സിപിഎമ്മിന്റെ പ്രാദേശികഘടകം ജില്ലാ നേതൃത്വത്തോട് പ്രകടിപ്പിച്ചതായാണ് സൂചന. പിണറായി ഈ പരിപാടിയില് നിന്നും വിട്ടുനില്ക്കണമെന്നാണ് ഇവരുടെ ആവശ്യം.
കഴിഞ്ഞ തെരഞ്ഞെടുപ്പില് സിപിഎമ്മിനെതിരെ ശക്തമായ ആരോപണങ്ങള് നടത്തിയ ആളാണ് വെള്ളാപ്പള്ളി നടേശനെ ന്നും പാര്ട്ടി സ്ഥാനാര്ത്ഥികളെ തോല്പ്പിക്കാന് ചുക്കാന് പിടിച്ച വ്യക്തിയെന്ന നിലയില് വെള്ളാപ്പള്ളിയോടൊപ്പം വേദി പങ്കിട്ടാല് അത് പുനലൂരില് പാര്ട്ടിക്കിടയില് ഭിന്നിപ്പ് ഉണ്ടാകുമെന്നും നേതാക്കള് പറയുന്നു. വെള്ളാപ്പള്ളിയാണ് ബിഡിജെഎസ് എന്ന പാര്ട്ടി രൂപീകരിക്കാന് മുന്നില് നിന്നയാളാണെന്നും പാര്ട്ടി രൂപീകരിച്ചതോടെ സിപിഎമ്മിന് ലഭിക്കേണ്ട ധാരാളം വോട്ടുകള് നഷ്ടമായെന്നും പ്രാദേശികനേതാക്കള് പറയുന്നു. ഒരുക്കാലത്ത് ഇടതുപക്ഷത്തിന്റെ ശക്തമായ അടിത്തറ ഈഴവ സമുദായവും അവരുടെ വോട്ടുമായിരുന്നു.
ആ വോട്ടുകള് ബിജെപിക്ക് മറിച്ച് നല്കിയ ആളാണ് വെള്ളാപ്പള്ളിയെന്നും പ്രാദേശികനേതാക്കള് ആരോപിക്കുന്നു.
അതേസമയം പ്രാദേശിക നേതൃത്വത്തിന്റെ എതിര്പ്പ് കാര്യമാക്കേണ്ടയെന്നാണ് സിപിഎം ജില്ലാ നേതൃത്വത്തിന്റെ അഭിപ്രായം. കോളേജിലെ പൂര്വവിദ്യാര്ത്ഥികൂടിയായ സിപിഎം ജില്ലാ സെക്രട്ടറി കെ.എന്.ബാലഗോപാലിന്റെ പ്രത്യേക ക്ഷണം കൂടി പിണറായിക്കുണ്ട്. കോളേജ് മാനേജ്മെന്റ് കെ.എന്.ബാലഗോപാലുമായി ബന്ധപ്പെട്ടാണ് ഉദ്ഘാടനത്തിന് പിണറായിയെ ക്ഷണിച്ചിരിക്കുന്നതും. അതിനാല് പ്രാദേശിക എതിര്പ്പ് എത്ര തന്നെയായാലും പിണറായി പരിപാടിയില് പങ്കെടുക്കും.
