കാഞ്ഞങ്ങാട്: രാമായണം ഒരു കൊള്ളക്കാരനില്‍ വരുത്തിയ മഹത്തായ പരിവര്‍ത്തനത്തിന് ഉദാഹരണമാണെന്നും, ഒരുപാട് ജീവിതങ്ങളുടെ സമാഹാരമാണെന്നും കേരള ക്ഷേത്ര സംരക്ഷണ സമിതി സംസ്ഥാന സമ്പര്‍ക്കപ്രമുഖ് ശര്‍മ്മ തേവലശ്ശേരി പറഞ്ഞു. മൊടഗ്രാമം ശ്രീ ധര്‍മ്മശാസ്താ ക്ഷേത്രത്തില്‍ നടന്ന രാമായണ മാസാചരണത്തിന്റെ സമാപന സമ്മേളനത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. ക്ഷേത്ര കാര്യനിര്‍വ്വഹണ സമിതി പ്രസിഡന്റ് ഐ.കെ.രാംദാസ് വാഴുന്നവര്‍ അധ്യക്ഷത വഹിച്ചു. ക്ഷേത്രം മേല്‍ശാന്തി ഗോപാലകൃഷ്ണഭട്ട് ഭദ്രദീപം തെളിയിച്ചു. കോടോം-ബേളൂര്‍ പഞ്ചായത്ത് അംഗം സി.കുഞ്ഞമ്പു ഉദ്ഘാടനം ചെയ്തു. കേരള ക്ഷേത്ര സംരക്ഷണ സമിതി ജില്ലാ പ്രസിഡന്റ് ടി.വി.ഭാസ്‌കരന്‍ ഉന്നതവിജയം നേടിയ വിദ്യാര്‍ത്ഥികളെ അനുമോദിച്ചു. രാമായണ ക്വിസ് മത്സര വിജയികള്‍ക്ക് ക്ഷേത്രകാര്യ നിര്‍വ്വഹണ സമിതി വൈസ് പ്രസിഡന്റ് കെ.വി.കൃഷ്ണന്‍ സമ്മാനദാനം നിര്‍വ്വഹിച്ചു. സെക്രട്ടറി വി.രാജന്‍ സ്വാഗതവും, മുരളീകൃഷ്ണന്‍ നന്ദിയും പറഞ്ഞു.
പ്രതികരിക്കാൻ ഇവിടെ എഴുതുക: