കൊല്ലം: കൊട്ടിയം മുഖത്തല ഡീസന്റ് ജംഗ്ഷനില് വിദ്യാഭ്യാസവകുപ്പിന്റെ നിബന്ധനകള്ക്ക് വിധേയമല്ലാതെ പ്രവര്ത്തിക്കുന്ന പീസ് ഫൗണ്ടേഷന്റെ പബ്ലിക് സ്കൂള് പൊതു വിദ്യാഭ്യാസ വകുപ്പ് അടച്ചുപൂട്ടണമെന്ന് ഹിന്ദുഐക്യവേദി സംസ്ഥാന സെക്രട്ടറി തെക്കടം സുദര്ശനന് പറഞ്ഞു.
തീവ്രവാദസംഘടനയായ ഐഎസുമായി ബന്ധമുണ്ടെന്നാരോപിക്കുന്ന സ്കൂളിന്റെ പ്രവര്ത്തനത്തെക്കുറിച്ച് എന്ഐഎ അന്വേഷണം ആവശ്യപ്പെട്ട് ഹിന്ദുഐക്യവേദി സ്കൂളിലേക്ക് നടത്തിയ പ്രതിഷേധമാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം. ഈ സ്കൂളിന്റെ ആദ്യം മുതലുള്ള പ്രവര്ത്തനം സംശയകരമാണ്. സ്കൂളിന്റെ മറവില് നടക്കുന്നത് മതംമാറ്റവും തീവ്രവാദപ്രവര്ത്തനവുമാണ്. സ്കൂള് റെയ്ഡു ചെയ്താല് അവിടെ നിന്നും രാജ്യത്തിനെതിരായി പ്രവര്ത്തിക്കുന്നതിന് പ്രേരണ നല്കുന്ന ലഘുലേഖകളും സിഡികളും കണ്ടെത്താന് സാധിക്കും. പോലീസ് അതിനുള്ള ആര്ജ്ജവം കാട്ടണം. ന്യൂനപക്ഷ സംരക്ഷണത്തിന്റെ മറവില് നടക്കുന്ന തീവ്രവാദപ്രവര്ത്തനം ചെറുക്കാന് സര്ക്കാര് തയാറാകണം. കേരളത്തില് തീവ്രവാദ പ്രവര്ത്തനം നടക്കുന്നുണ്ടെന്ന് പറയുന്ന മുഖ്യമന്ത്രി പിണറായി വിജയന് തീവ്രവാദികളെ പിടികൂടുന്നതിന് വേണ്ടിയുള്ള നടപടി സ്വീകരിക്കുന്നില്ല. തീവ്രവാദികള്ക്ക് കാവല് നില്ക്കേണ്ട ഗതികേട് കേരളാപോലീസിനുണ്ടായത് അപമാനരമാണ്. സ്കൂളിന്റെ പ്രവര്ത്തനം തുടര്ന്നാല് വര്ഷം തോറും തീവ്രവാദികളുടെ എണ്ണം കേരളത്തില് വര്ദ്ധിക്കും. സ്കൂള് അടച്ച് പൂട്ടുന്നതുവരെ ശക്തമായ സമരവുമായി ഹിന്ദുഐക്യവേദി മുന്നോട്ട് പോകുമെന്നും അദ്ദേഹം കൂട്ടിച്ചേര്ത്തു. ഹിന്ദുഐക്യവേദി ജില്ലാ പ്രസിഡന്റ് പി.ശശിധരന് അദ്ധ്യക്ഷത വഹിച്ചു.
സംസ്ഥാന സെക്രട്ടറി പുത്തൂര് തുളസി, മഞ്ഞപ്പാറ സുരേഷ്, പ്രവീണ്കുമാര്, ജി. അശോകന്, രമേശ്ബാബു, തെക്കേകാവ് മോഹനന്, ആനന്ദന് എന്നിവര് സംസാരിച്ചു. പുന്തലത്താഴത്ത് നിന്നാരംഭിച്ച പ്രതിഷേധ മാര്ച്ച് സ്കൂളിന് മീറ്ററുകള്ക്കകലെ പോലീസ് തടഞ്ഞു.
