ഭാരതീയർക്ക് വൃക്ഷ പൂജയ്ക്ക് വലിയസ്ഥാനം നൽകിവരുന്നു. എല്ലാത്തരം വൃക്ഷങ്ങൾക്കും സസ്യങ്ങൾക്കും ഭാരതീയർ അതിന്റേതായ മാഹാത്മ്യം അനുസരിച്ച് പൂജനിർവഹിച്ചുവരുന്നുണ്ട്. ഭൂമിയിലെ സകല ചരാചരങ്ങളുടേയും നിലനിൽപ്പുതന്നെ നാനാ വൃക്ഷ ലതാദികളിൽനിന്നും ലഭിക്കുന്ന ഭക്ഷണ പദാർത്ഥങ്ങളെ ആശ്രയിച്ചാണെന്നുകാണാം. വൃക്ഷത്തെ ഇത്രയും സ്നേഹിക്കുന്ന സംസ്കാരം വേറേ പ്രദേശത്തുകാണാൻ സാദ്ധ്യമല്ല.
ക്ഷേത്രകാര്യങ്ങൾക്കുവേണ്ടി യാണെങ്കിലും മുറിക്കുന്ന മരങ്ങളോട് ക്ഷമാപണംചൊല്ലി അതിന്റെ അനുവാദത്തോടെയാണ് മുറിക്കുന്നതുതന്നെ. വെള്ളവും വളവും വേണ്ട സമയത്ത് നൽകി അതിന്റെ ചുവട്ടിൽ വിശ്രമിക്കുന്നവർക്കും തന്നെ വെട്ടുവാൻ മഴുവും ഓങ്ങിവരുന്നവരോടും തണലേറ്റിനിൽക്കുന്ന വൃക്ഷത്തിന്റെ മഹത്വത്തെ പൂർവികർ ആഴത്തിൽ തിരിച്ചറിഞ്ഞു. വൃക്ഷങ്ങൾ ഉള്ളകാലം വരെമാത്രമേ മനുഷ്യർ ഭൂമിയിൽ അധിവസിക്കൂ എന്ന് ഋഗ്വേദം പറയുന്നു.
വൃക്ഷം നട്ട് പരിപാലിച്ച് പുത്രനെപ്പോലെ ശുശ്രൂഷചെയ്യുന്നവന്റെ കീർത്തി ഏതുകാലത്തും ശ്രേയസ്സോടെ നിലനിൽക്കുമെന്ന് അഗ്നി പുരാണം പറയുന്നു. വാൽമീകി, ച്യവനൻ, ധന്വന്തരി, ചരകൻ, സുശ്രുതൻ, തുടങ്ങിയ ഋഷിമാർ വൃക്ഷങ്ങൾ പുഷ്പങ്ങൾ സസ്യങ്ങൾ തുടങ്ങിയവയുടെ മഹത്വം ഔഷധഗുണം എന്നിവ തിരിച്ചറിഞ്ഞവരായിരുന്നു. അവർപകർന്നു നൽകിയ വിജ്ഞാനമാണ് നമ്മുടെയെല്ലാം ആരോഗ്യത്തിന്റെ രഹസ്യം.
