പട്ടിക വിഭാഗത്തില്‍പ്പെട്ടവര്‍ക്ക് ജനറല്‍ നഴ്‌സിംഗ് ആന്റ് മിഡ്‌വൈഫറി ഡിപ്ലോമ: അപേക്ഷ ക്ഷണിച്ചു

കല്‍പ്പറ്റ : മെഡിക്കല്‍ വിദ്യാഭ്യാസ വകുപ്പിന്റെ കീഴില്‍ പട്ടികജാതി പട്ടികവര്‍ഗ്ഗ വിഭാഗത്തില്‍പ്പെട്ടവര്‍ക്ക് വേണ്ടി തിരുവനന്തപുരം, കോട്ടയം, കോഴിക്കോട് സര്‍ക്കാര്‍ നഴ്‌സിംഗ് കോളേജുകളില്‍ നടത്തുന്ന ഡിപ്ലോമ ഇന്‍ ജനറല്‍ നഴ്‌സിംഗ് ആന്റ് മിഡ്‌വൈഫറി കോഴ്‌സിലേയ്‌ക്ക് അപേക്ഷ ക്ഷണിച്ചു. അപേക്ഷകര്‍ പ്ലസ്ടുവിന് ഫിസിക്‌സ്, കെമിസ്ട്രി, ബയോളജി എന്നീ വിഷയങ്ങള്‍ എടുത്ത് പാസ്സായവരായിരിക്കണം. പ്ലസ്ടു വൊക്കേഷണല്‍ എ.എന്‍.എം കോഴ്‌സ് പാസ്സായവരെയും പരിഗണിക്കും. അപേക്ഷകര്‍ 2016 ഡിസംബര്‍ 31ന് 17 വയസ്സ് പൂര്‍ത്തിയാകുന്നവരും 35 വയസ്സ് കഴിയാത്തവരും ആയിരിക്കണം. മൂന്നു ശതമാനം സീറ്റ് 40 ശതമാനം മുതല്‍ 50 ശതമാനം വരെ ശാരീരിക വൈകല്യമുള്ളവര്‍ക്ക് സംവരണം ചെയ്തിട്ടുണ്ട്. അപേക്ഷാ ഫോറം ആഗസ്റ്റ് 17 മുതല്‍ സെപ്റ്റംബര്‍ 7 വരെ 100 രൂപ നിരക്കില്‍ സംസ്ഥാനത്തെ സര്‍ക്കാര്‍ നഴ്‌സിംഗ് കോളജ് പ്രിന്‍സിപ്പാള്‍മാരുടെ ഓഫീസില്‍ നിന്നും ലഭിക്കും. (തിരുവനന്തപുരം, ആലപ്പുഴ, കോട്ടയം, തൃശ്ശൂര്‍, കോഴിക്കോട്) തപാല്‍മാര്‍ഗ്ഗം അപേക്ഷ ലഭിക്കണമെന്നുള്ളവര്‍ 150 രൂപയുടെ മണിയോര്‍ഡര്‍ സഹിതം അതാത് പ്രിന്‍സിപ്പാളിന്റെ ഓഫീസില്‍ സെപ്റ്റംബര്‍ 3ന് അഞ്ചുമണിക്കകം ലഭിക്കത്തക്ക വിധത്തില്‍ അയക്കണം. പൂരിപ്പിച്ച അപേക്ഷകള്‍ സെപ്റ്റംബര്‍ 26ന് മുമ്പ് തിരുവനന്തപുരത്തുള്ള മെഡിക്കല്‍ വിദ്യാഭ്യാസ കാര്യാലയത്തില്‍ ലഭിക്കണം. വൈകി കിട്ടുന്നതും നിര്‍ദ്ദിഷ്ട രീതിയില്‍ പൂരിപ്പിക്കാത്തതുമായ അപേക്ഷകള്‍ നിരസിക്കും. കൂടുതല്‍ വിവരങ്ങള്‍ അപേക്ഷ ഫോറത്തോടൊപ്പം ലഭിക്കുന്ന പ്രോസ്‌പെക്ടസില്‍ ലഭ്യമാണ്. ഫോണ്‍: 0471 2528575.