ഫ്ലോറിഡ: ഡോൾഫിൻ എന്നും കൗതുകമുണർത്തുന്ന മാന്ത്രിക ജീവിയാണ്, അതിന്റെ അഭ്യാസ പ്രകടനങ്ങൾ ആസ്വദിക്കാത്തവരായി ആരും തന്നെ ഉണ്ടാവില്ല. അടുത്തിടെ ഫ്ലോറിഡയിലെ ഒർലാൻഡോ വാട്ടർ തീം പാർക്കിലെ ഒരു കൊച്ചു ഡോൾഫിൻ കാണിച്ച സംഗതി ഏവരെയും അക്ഷരാർത്ഥത്തിൽ ഞെട്ടിച്ച് കളഞ്ഞു.
ഡോൾഫിനുകളുടെ കുളത്തിനു സമീപം എത്തിയ വിനോദ സഞ്ചാരിയായ യുവതിക്ക് ഡോൾഫിൻ എട്ടിന്റെ പണിയാണ് കൊടുത്തത്. എന്താണെന്നോ? കുളത്തിന്റെ കരയിൽ നിന്ന് കാഴ്ചകൾ കണ്ടു നിന്ന യുവതിയുടെ കൈകളിലുണ്ടായിരുന്ന ഐപാഡ് ഡോൾഫിൻ കടിച്ചെടുത്ത് ജലത്തിലേക്ക് കുതിക്കുകയായിരുന്നു.
എന്തായാലും യുവതിയുടെ ഭാഗ്യം കൊണ്ട് ഡോൾഫിന്റെ വായിൽ നിന്നും ഐപാഡ് ജലത്തിൽ വീണു. ഉടൻ തന്നെ യുവതി ജലത്തിൽ നിന്നും ഐപാഡ് പെട്ടന്ന് കൈക്കലാക്കുകയായിരുന്നു. പക്ഷേ എന്തു ചെയ്യാൻ ഐപാഡിൽ മുഴുവൻ വെള്ളം കയറി, ഐപാഡ് ശരിയാകുമെന്ന പ്രതീക്ഷയിൽ യുവതി കുലുക്കുകയും തുടയ്ക്കുകയുമൊക്കെ ചെയ്തു.
ഇതേ സമയം ഞാൻ ഒന്നും ചെയ്തിട്ടില്ല എന്ന മട്ടിൽ നമ്മുടെ ഡോൾഫിൻ കാഴ്ചക്കാർക്കു നേരെ ചിരിച്ചും വാലിട്ടിളക്കിയും അവിടെ നീന്തിക്കൊണ്ടിരുന്നു.
