പെരിന്തല്മണ്ണ: ഭീകരവാദത്തെ ഇസ്ലാം മതുവുമായി ബന്ധപ്പെടുത്തി രാജ്യത്തിന്റെ മതേതരത്വം തകര്ക്കാനാണ് സിപിഎം ശ്രമിക്കുന്നതെന്ന് ബിജെപി ദേശീയ നിര്വാഹക സമിതിയംഗം പികെ കൃഷ്ണദാസ്. യുവമോര്ച്ചയുടെ ആഭിമുഖ്യത്തില് പെരിന്തല്മണ്ണയില് സംഘടിപ്പിച്ച ദേശരക്ഷാ ജ്വാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സിപിഎമ്മിന്റെ കള്ളക്കളി ജനങ്ങള് തിരിച്ചറിയും. ഭീകരവാദ സംഘടനകളിലേക്കുള്ള റിക്രൂട്ടിങാണ് ലൗ ജിഹാദ് വഴി നടക്കുന്നത്. ഇത്തരത്തില് ചതിയില്പ്പെടുന്ന പെണ്കുട്ടികളെ നിര്ബന്ധിച്ച് മതം മാറ്റുന്ന സത്യസരണി പോലുള്ള മതപരിവര്ത്തന കേന്ദ്രങ്ങള് അടച്ചു പൂട്ടാന് പിണറായി സര്ക്കാരിന് ധൈര്യമുണ്ടോയെന്നും അദ്ദേഹം ചോദിച്ചു.
വോട്ട് ബാങ്ക് രാഷ്ട്രീയത്തിന്റെ പേരില് രാജ്യദ്രോഹികളെ സഹായിക്കുന്ന നിലപാടാണ് സിപിഎമ്മും കോണ്ഗ്രസും ചെയ്യുന്നത്. ഭീകരവാദത്തിനെതിരെ ചില മുസ്ലീം സംഘടനകള് ശക്തമായ നിലപാട് എടുത്തത് അഭിനന്ദനാര്ഹമാണ്. അതേസമയം, ഇത്തരം ഭീകരിവാദികള്ക്കെതിരെ പരസ്യ പ്രസ്താവന പോലും നടത്താത്ത സിപിഎം കേരള സമൂഹത്തിന് തന്നെ അപമാനമാണ്. ഇവരുടെ ബിജെപി വിരുദ്ധതത ദേശവിരുദ്ധ നിലപാടുകളായി മാറുകയാണ്. ഭീകരവാദികളും അവരെ അനുകൂലിക്കുന്നവരും ഇന്ത്യ വിടുകയെന്ന യുവമോര്ച്ചയുടെ മുദ്രാവാക്യം കാലികപ്രസക്തമാണ്. അദ്ദേഹം കൂട്ടിച്ചേര്ത്തു.
യോഗത്തില് യുവമോര്ച്ച ജില്ലാ പ്രസിഡന്റ് ബി.രതീഷ് അദ്ധ്യക്ഷത വഹിച്ചു. സംസ്ഥാന സെക്രട്ടറി അജി തോമസ് മുഖ്യപ്രഭാഷണം നടത്തി. ബിജെപി സംസ്ഥാന വൈസ് പ്രസിഡന്റ് എന്.ശിവരാജ്, ജില്ലാ പ്രസിഡന്റ് കെ.രാമചന്ദ്രന്. ജില്ലാ ജനറല് സെക്രട്ടറി പി.ആര്.രശ്മില്നാഥ്, മേഖലാ സെക്രട്ടറിഎം.പ്രേമന്, ബിജെപി സംസ്ഥാന സമിതിയംഗം അഡ്വ.അശോക് കുമാര്, കെ.ടി അനില്കുമാര്, സുധീഷ് ഉപ്പട, ഷിനോജ് പണിക്കര്, ശിതു കൃഷ്ണന്, ബിജെപി മണ്ഡലം പ്രസിഡന്റ് അഡ്വ.എം.കെ.സുനില് എന്നിവര് സംസാരിച്ചു.
