സ്വന്തം ലേഖകന്
കുന്നത്തൂര്: കഴിഞ്ഞദിവസം താലൂക്ക് ഓഫീസ് ഹാളില് ചേര്ന്ന താലൂക്ക് വികസന സമിതിയോഗം പ്രഹസനമായി. ജനപ്രതിനിധികളുടെ പങ്കാളിത്തകുറവുമൂലം ക്രിയാത്മകമായ തീരുമാനങ്ങളോ ചര്ച്ചകളോ നിര്ദേശങ്ങളോ കൂടാതെയാണ് സമിതി യോഗം പിരിഞ്ഞത്.
ശനിയാഴ്ച നടക്കേണ്ടിയിരുന്ന യോഗം കോവൂര് കുഞ്ഞുമോന് എംഎല്എയുടെ സൗകര്യാര്ത്ഥമാണ് മാറ്റിവച്ചത്. അന്ന് എല്ഡിഎഫിന്റെ വികസന സെമിനാര് ഉള്ളതുകൊണ്ടാണ് യോഗം മാറ്റിവച്ചതെന്ന് അരോപണവും ഉയര്ന്നിരുന്നു. എന്നാല് എംഎല്എയുടെ സൗകര്യത്തിനായി മാറ്റിവച്ച വികസനസമിതി യോഗം കഴിഞ്ഞ ദിവസം ചേര്ന്നിട്ടും കോവൂര് കുഞ്ഞുമോന് പങ്കെടുത്തില്ല.
അതേ സമയം പാര്ട്ടി പരിപാടിയില് പങ്കെടുക്കാന് പോയ കുഞ്ഞുമോന് വികസന സമിതി യോഗത്തില് എത്തില്ലെന്ന് അറിയിച്ചതുമില്ല. ഏറെ നേരം കാത്തിരുന്നിട്ടും എംഎല്എ എത്താതായതോടെ ബ്ലോക്ക് പഞ്ചായത്ത് പ്രസിഡന്റിന്റെ അധ്യക്ഷതയില് യോഗം ചേര്ന്നെങ്കിലും ആകെ ഉണ്ടായിരുന്നത് ഒരു ജില്ലാപഞ്ചായത്ത് അംഗവും കുറച്ച് രാഷട്രീയ പാര്ട്ടി പ്രതിനിധികളും ഉദ്യോഗസ്ഥരും മാത്രം.
താലൂക്ക് പരിധിയിലുള്ള ഏഴ് പഞ്ചായത്തുകളില് നിന്നും പ്രസിഡന്റുമാരോ ബന്ധപ്പെട്ടവരോ യോഗത്തിന് എത്തിയില്ല. കഴിഞ്ഞ താലൂക്ക് വികസനസമിതി യോഗത്തിലെ റിപ്പോര്ട്ട് അവതരിപ്പിച്ച ശേഷം ചില അംഗങ്ങളുടെ ചോദ്യവും നിര്ദേശങ്ങളും മിനിട്ട്സില് രേഖപ്പെടുത്തി ചായയും കുടിച്ച് എല്ലാവരും പിരിഞ്ഞു.
താലൂക്കിലെ വികസനകാര്യങ്ങള് ചര്ച്ച ചെയ്യുന്നതിനും നിര്ദേശങ്ങള് കൈകൊളുന്നതിനുമായാണ് മാസത്തിലെ ആദ്യ ശനിയാഴ്ച സ്ഥലം എംഎല്എയുടെ അധ്യക്ഷതയില് വികസനസമിതി ചേരുന്നത്. നിയമസഭയില് പ്രാതിനിധ്യമുള്ള രാഷ്ട്രീയപാര്ട്ടി പ്രതിനിധികള്, പഞ്ചായത്ത് പ്രസിഡന്റുമാര്, ബ്ലോക്ക് പ്രസിഡന്റ്, ജില്ലാ പഞ്ചായത്ത് അംഗങ്ങള്, തഹസീല്ദാര് ഉള്പ്പെടെ ബന്ധപ്പെട്ട വകുപ്പ് ഉദ്യോഗസ്ഥര് എന്നിവരാണ് യോഗത്തില് പങ്കെടുക്കേണ്ടത്.
എന്നാല് മിക്ക യോഗങ്ങളും പങ്കാളിത്ത കുറവുമൂലം പ്രഹസനമാകുന്നതായി ആക്ഷേപം ഉയര്ന്നിട്ടുണ്ട്. സമിതിയില് ഉന്നയിക്കുന്ന ചോദ്യങ്ങള്ക്ക് മറുപടി പറയാന് ബന്ധപ്പെട്ട ഉദ്യോഗസ്ഥര് ഇല്ലാത്തതും സമിതിയെടുത്ത നിര്ദേശങ്ങളും തീരുമാനങ്ങളും നടപ്പാക്കാന് ആര്ജവം കാട്ടാത്തതും എംഎല്എയുടെ വാക്കിന് പുല്ലുവില കല്പ്പിക്കുന്ന ഉദ്യോഗസ്ഥരുമുള്ള യോഗത്തില് പങ്കെടുത്തിട്ടും വലിയ കാര്യമില്ലെന്നാണ് ചില ജനപ്രതിനിധികളുടെ പക്ഷം. നിയമസഭയില് അംഗമില്ലാത്തതിന്റെ പേരില് ബിജെപിയെ സമിതിയില് നിന്നും അകറ്റിനിര്ത്തിയ സാഹചര്യമല്ല ഇപ്പോഴുള്ളതെന്നും സമിതിയില് ശക്തമായ പ്രതിഷേധസ്വരം ഉയര്ത്താന് ബിജെപി സജീവമായി രംഗത്തുണ്ടാകുമെന്നും നിയോജകമണ്ഡലം പ്രസിഡന്റ് ആര്.രാജേന്ദ്രന്പിള്ള അറിയിച്ചു.
