കോഴിക്കോട്: നാണ്യവിളകളുടെ വിലയിടിവും.. കടക്കെണിയും കര്ഷകരെ ആത്മഹത്യയിലേക്ക് തള്ളിവിടുന്ന വര്ത്തമാനകാലത്തിന്റെ അവതരണത്തിനൊപ്പം നന്മ നിറഞ്ഞ ഒരു കാലഘട്ടം അവസാനിക്കുന്നതിന്റെ വേദന കൂടി പങ്കുവെയ്ക്കുകയാണ് ‘കല്പ്പം’ എന്ന ഹ്രസ്വ ചിത്രം.
മണ്ഡരിയും മറ്റ് രോഗങ്ങളും നാളികേര കര്ഷകര് ദുരിതത്തിലേക്ക് തള്ളിവിടുകയാണ്. ഈ ദുരിതം നിറഞ്ഞ കാലത്ത് ജീവിതം വഴിമുട്ടിയ കര്ഷകനാണ് നാണു. കടക്കെണിയില് മുങ്ങിത്താഴുന്ന നാണുവിന്റെ ദുരിതം അവതരിപ്പിക്കുന്നതിലൂടെ നന്മകള് നഷ്ടമായിക്കൊണ്ടിരിക്കുന്ന നാടിന്റെ വേദനയും ചിത്രം പങ്കുവെയ്ക്കുന്നു. ജീവിതത്തില് പ്രിയപ്പെട്ടതോരോന്നും നാണുവിന് നഷ്ടമാവുകയാണ്. തന്നെ സഹായിക്കാന് ഇറങ്ങിത്തിരിച്ച ചാത്തുക്കുട്ടിയുടെ മരണവും കൂടി അയാള്ക്ക് കാണേണ്ടിവരുന്നു.
നാട്ടിന് പുറത്ത് നടക്കുന്ന ചെറുസംഭവങ്ങളിലൂടെ എല്ലാം തകര്ത്തെറിയുന്ന നവ ലിബറല് നയങ്ങള് കൂടിയാണ് ചിത്രം ചര്ച്ച ചെയ്യുന്നത്. എല്ലാം നഷ്ടപ്പെടുമ്പോഴും പുതിയ പ്രതീക്ഷകളുമായി കാത്തിരിക്കുകയാണ് നാണു.
നാണുവായി ഹരിദാസ് പനായിയും ചാത്തുക്കുട്ടിയായി രാജീവന് കോക്കല്ലൂരും സൗദാമിനിയായി പുഷ്പ ഗംഗാധരനും മികച്ച പ്രകടനം കാഴ്ച വെക്കുന്നു. പപ്പന് പനായി, വേദ രാജീവന്, രാജന് കെ പി സി, സതീശന് കോതങ്കല്, പരീദ് കോക്കല്ലൂര് തുടങ്ങിയവരാണ് മറ്റു കഥാപാത്രങ്ങളെ അവതരിപ്പിക്കുന്നത്. പ്രേംകുമാര് രചനയും സംവിധാനവും നിര്വ്വഹിച്ച ഈ ഹ്രസ്വചിത്രത്തിന്റെ സംഗീതം വീനീത് പൂനത്തും എഡിറ്റിംഗ് വരുണ് സര്ഗയും നിര്വ്വഹിച്ചിരിക്കുന്നു. വി എസ് ആനന്ദാണ് ക്യാമറ. ടാഗോര് ക്രിയേഷന്സാണ് നിര്മ്മാണം. ആഗസ്റ്റ് 15 ന് ചിത്രം പുറത്തിറങ്ങും.
