മലപ്പുറം: ജില്ലയില്‍ രോഗപ്രതിരോധ കുത്തിവെപ്പ് ഫലപ്രദമായി നടന്നിട്ടില്ലെന്ന് ആരോഗ്യമന്ത്രി കെ.കെ.ശൈലജ ടീച്ചര്‍. കുത്തിവെപ്പ് ശാക്തീകരണവുമായി ബന്ധപ്പെട്ട് നടന്ന അവലോകന യോഗത്തിന് ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍. പ്രതിരോധ കുത്തിവെപ്പ് എടുക്കാത്ത കുട്ടികളിലാണ് ഡിഫീതിരിയ പോലുള്ള രോഗങ്ങള്‍ ബാധിച്ചത്. മൂന്നുമാസത്തിനകം 100 ശതമാനം കുത്തിവെപ്പെടുക്കുമെന്നും അവര്‍ പറഞ്ഞു.
ടൗണ്‍ഹാളില്‍ നടന്ന അവലോകന യോഗം മന്ത്രി ഉദ്ഘാടനം ചെയ്തു. മൂന്ന് മാസത്തിനകം കുത്തിവെപ്പ് പൂര്‍ത്തിയാക്കുന്നതില്‍ തദ്ദേശ സ്വയംഭരണ സ്ഥാപനങ്ങള്‍ക്ക് നിര്‍ണായക പങ്കുണ്ടെന്നും ആരോഗ്യ വകുപ്പ് ജീവനക്കാര്‍ക്കൊപ്പം ജനപ്രതിനിധികളും മറ്റ് മത-സാംസ്‌കാരിക സംഘടനകളും കൂട്ടായ്മയോടെ പ്രവര്‍ത്തിക്കണമെന്നും മന്ത്രി അഭ്യര്‍ത്ഥിച്ചു. പരിപാടിയില്‍ പങ്കെടുത്ത ജനപ്രതിനിധികളും മതനേതാക്കളും കുത്തിവെപ്പിന് പൂര്‍ണ പിന്തുണ പ്രഖ്യാപിച്ചു. കുത്തിവെപ്പിന് വിരുദ്ധമായ അഭിപ്രായങ്ങള്‍ പ്രചരിപ്പിക്കുന്നത് തടയേണ്ടതാണ്. വിജയകരമാണെന്ന് തെളിഞ്ഞ ശാസ്ത്രീയമായ ഒരു പ്രതിരോധ സംവിധാനം നിഷേധിക്കുന്നത് ഖേദകരമാണ്. മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ പൊതുജനങ്ങള്‍ കാര്യക്ഷമമായി ഏറ്റെടുക്കണം. തദ്ദേശ സ്വയംഭരണ സ്ഥാനങ്ങള്‍ ഇക്കാര്യത്തില്‍ ജാഗ്രത പുലര്‍ത്തണം. മാലിന്യ നിര്‍മാര്‍ജനവുമായി ബന്ധപ്പെട്ട നിബന്ധനകള്‍ പാലിക്കാത്തവരെ നിയമാനുസൃതമായ വകുപ്പുകള്‍ പ്രകാരം അനുസരിപ്പിക്കണം. ജനകീയ ആരോഗ്യനയം രൂപവത്ക്കരിക്കും: സാധാരണക്കാര്‍ക്ക് ഉപയോഗപ്രദമാകും വിധം ജനകീയ ആരോഗ്യനയം രൂപവത്കരിക്കുമെന്ന് മന്ത്രി അറിയിച്ചു. ആറ് മാസത്തിനകം എല്ലാ പിഎച്ച്‌സികളിലും ഡോക്ടര്‍മാരെ നിയമിക്കും. അപ്‌ഗ്രേഡ് ചെയ്ത ആരോഗ്യ കേന്ദ്രങ്ങളില്‍ തസ്തിക നിര്‍ണയം പൂര്‍ത്തിയാക്കാനുള്ള ശ്രമം നടക്കുന്നുണ്ട്. എന്നാല്‍ സര്‍ക്കാര്‍ ആശുപത്രികളില്‍ ജോലി ചെയ്യാന്‍ സന്നദ്ധരായ ഡോക്ടര്‍മാരുണ്ടാവണമെന്ന് മന്ത്രി പറഞ്ഞു.
പൊതുജനങ്ങള്‍ക്കുള്ള സംശയങ്ങള്‍ അകറ്റാന്‍ ഉദ്യോഗസ്ഥര്‍ ബാധ്യസ്ഥരാണെന്നും അശാസ്ത്രീയ ചികിത്സ, മന്ത്രവാദം തുടങ്ങിയവ നിയന്ത്രിക്കുന്നതിന് നിയമനിര്‍മ്മാണം ആവശ്യമാണെന്നും ഇത്തരത്തിലുള്ള മാധ്യമ പരസ്യങ്ങള്‍ നിയന്ത്രിക്കണമെന്നും ഇതര സംസ്ഥാന തൊഴിലാളികളുടെ താമസ സ്ഥലങ്ങളില്‍ ശുചിത്വം ഉറപ്പാക്കണമെന്നും ഓടകളിലെ മാലിന്യം നീക്കുന്നതിന് പൊതുമരാമത്ത് വകുപ്പിന്റെ പങ്ക് അനിവാര്യമാണെന്നും സര്‍ക്കാരിന്റെ അധീനതയിലുള്ള ഒഴിഞ്ഞ് കിടക്കുന്ന സ്ഥലങ്ങളിലെ മാലിന്യ നിക്ഷേപം ഗൗരവമായി കാണണമെന്നും സ്‌കൂള്‍ പ്രവേശനത്തിന് കുത്തിവെപ്പ് നിര്‍ബന്ധമാക്കണമെന്നും തുടര്‍ന്ന് സംസാരിച്ച മതസംഘടനാ-രാഷ്‌ട്രീയ പാര്‍ട്ടി പ്രതിനിധികള്‍ ആവശ്യപ്പെട്ടു.
മന്ത്രി കെ.ടി.ജലീല്‍ അദ്ധ്യക്ഷനായി. വി.അബ്ദുറഹ്മാന്‍ എംഎല്‍എ, ആരോഗ്യ വകുപ്പ് സെക്രട്ടറി രാജീവ് സദാനന്ദന്‍, ജില്ലാ കലക്ടര്‍ എസ്. വെങ്കടേസപതി, ആരോഗ്യ വകുപ്പ് ഡയറക്ടര്‍ ഡോ.ആര്‍.രമേശ്, എന്‍.എച്ച്.എം. ഡയറക്ടര്‍ ജി.ആര്‍. ഗോകുല്‍, ജില്ലാ മെഡിക്കല്‍ ഓഫീസര്‍ ഡോ. വി. ഉമ്മര്‍ ഫാറൂഖ്, ഡെപ്യൂട്ടി ഡി.എം.ഒ ഡോ. രേണുക തുടങ്ങിയവന്‍ സംസാരിച്ചു. കുത്തിവെപ്പ് പ്രതിരോധ പ്രവര്‍ത്തനങ്ങളുമായി പൂര്‍ണമായി സഹകരിക്കണമെന്നാവശ്യപ്പെട്ട് വിവിധ മതസംഘടനാ നേതാക്കള്‍ നടത്തിയ അഭ്യര്‍ഥനയുടെ സമാഹാരം ആരോഗ്യ വകുപ്പ് സെക്രട്ടറി രാജീവ് സദാനന്ദന്‍ മന്ത്രി കെ.കെ. ശൈലജയ്‌ക്ക് നല്‍കി പ്രകാശനം ചെയ്തു.
പ്രതികരിക്കാൻ ഇവിടെ എഴുതുക: