മലപ്പുറം: വട്ടപ്പറമ്പില്‍ ജനവാസകേന്ദ്രത്തില്‍ കോഴിമാലിന്യം തള്ളിയ വാഹനം നാട്ടുകാര്‍ തടഞ്ഞു. അല്‍ഹുദ ഇംഗ്ലീഷ് മീഡിയം സ്‌കൂള്‍ റോഡില്‍ ഇന്നലെ പുലര്‍ച്ചെയാണ് സംഭവം. വീട്ടുമുറ്റത്തും സ്‌കൂളിന് സമീപവും വലിയ ചാക്കുകളിലാക്കിയാണ് മാലിന്യം കൊണ്ടിട്ടത്. ആളുകള്‍ തിങ്ങിപ്പാര്‍ക്കുന്ന പ്രദേശത്ത് പിക്കപ്പ്‌വാനിലാണ് മാലിന്യമെത്തിച്ചത്. റോഡരികിലും വീട്ടുമുറ്റത്തും മാലിന്യചാക്കുകള്‍ വലിച്ചെറിഞ്ഞ നിലയിലായിരുന്നു. കിണറുകള്‍ക്കരികിലും സ്‌കൂളിന് സമീപവും ചാക്കുകെട്ടുകള്‍ കൊണ്ടിട്ടു. ദുര്‍ഗന്ധം വമിച്ചതിനെ തുടര്‍ന്ന് നാട്ടുകാര്‍ നടത്തിയ പരിശോധനയിലാണ് മാലിന്യംതള്ളല്‍ ശ്രദ്ധയില്‍പ്പെട്ടത്. ഇതോടെ മാലിന്യംതള്ളി തിരിച്ചുപോകുകയായിരുന്ന വാഹനം പ്രദേശവാസികള്‍ സംഘടിച്ച് തടഞ്ഞു.
തുടര്‍ന്ന് മലപ്പുറം പൊലീസെത്തി റോഡരികിലും മറ്റും തള്ളിയ കോഴിഅവശിഷ്ടം വാഹനത്തിലുള്ളവരെ കൊണ്ടുതന്നെ തിരിച്ചെടുപ്പിച്ചു. നാട്ടുകാരുടെ പരാതിയില്‍ വാഹനത്തിന്റെ ഡ്രൈവര്‍ ചേങ്ങോട്ടൂര്‍ സ്വദേശി ജാബിറിനെതിരെ കേസെടുത്തതായി പൊലീസ് അറിയിച്ചു.
പ്രതികരിക്കാൻ ഇവിടെ എഴുതുക: